ЯПОНИЯНИНГ ЙИРИК КОМПАНИЯСИ “НАВОИЙУРАН” БИЛАН ҲАМКОРЛИК ҚИЛИШ ИСТАГИДА
Япониянинг “Sumitomo Corporation” компаниялар гуруҳи вакиллари “Навоийуран” давлат корхонасига ташриф буюришди. Ташрифдан кўзланган асосий мақсад ҳар икки томон учун ҳам манфаатли бўлган уран савдоси ва уран ишлаб чиқариш билан боғлиқ ҳамкорлик истиқболлари ва имкониятларини муҳокама қилиш ҳамда фикр алмашишдан иборат.
Дастлаб делегация аъзолари “Навоийуран” давлат корхонаси бош директори Ж.Хасанов билан учрашди.
Учрашувда “Sumitomo Corporation” компаниялар гуруҳининг Тошкент офиси бошлиғи Ито Акира самимий ва дўстона қабул учун корхона раҳбарига миннатдорчилик билдирди.
Шундан сўнг, меҳмонлар япон компаниясининг тоғ-кон саноати ва уран ишлаб чиқариш соҳасига оид йўналишлари бўйича тақдимот ўтказишди. Хусусан,
1919 йилда ташкил этилган компания 100 йилдан зиёд вақт давомида савдо ва инвестиция соҳасида фаолият юритиб келаётгани, ҳозирда Япониянинг энг йирик улгуржи савдо ташкилотларидан бирига айлангани айтиб ўтилди.
“Жаҳоннинг 66 мамлакатида 130дан ортиқ ваколатхоналарига эга бўлган компаниямизда 79 000 нафардан зиёд раҳбар ва мутахассислар ишламоқда. Умумий фаолиятимизнинг қарийб 30%ини кончилик, энергия ишлаб чиқариш, кимё ва электроника маҳсулотлари ташкил қилади”, - деди Ито Акира.
Шунингдек, компания рақамли трансформация, сульфат кислота, қўшма кредитлаш каби йўналишларда ҳам ўз хизматларини таклиф қилди. Жумладан, корхона эҳтиёжига қараб сульфат кислотасини етказиб бериш, сульфат кислота ишлаб чиқариш заводлари модернизацияси ва янги цехлар қуриш бўйича бир қатор таклифларини билдирди. Шу ўринда меҳмонлар корхонада сульфат кислотага бўлган талаб ва уни ишлаб чиқариш жараёнлари билан қизиқди.
Корхона раҳбари Ж.Хасанов “Учқудуқ” ишлаб чиқариш майдони Сульфат кислота ишлаб чиқариш цехи ҳақида маълумот берар экан, сўнгги йилларда цехда модернизация ишлари олиб борилиши натижасида маҳсулот ҳажмини йилига
550 минг тоннага етказиш имконияти яратилгани,
2017 йилда 5 МВт қувватга эга Ҳиндистон технологияси асосида буғ турбинаси ўрнатилгани натижасида цехнинг электр энергиясига бўлган талаби ўзи томонидан тўлиқ қопланаётганини, шу билан биргаликда, экологик хавфсизликни таъминлашга қаратилган муҳим лойиҳа бўлганини айтиб ўтди.
Бу ечим япониялик мутахассисларда катта қизиқиш уйғотди.
Ўз навбатида компания вакиллари ишлаб чиқариш самарадорлиги юқори ва экологик жиҳатдан янада хавфсизроқ бўлган цех лойиҳасини ишлаб чиқишлари мумкинлигини билдиришди. Бундан ташқари, делегация ўз компаниясининг хорижий тажрибалари билан ҳам ўртоқлашди ва маъқул келган таклифларини кўриб чиқилиши Япония томони учун манфаатли бўлишини таъкидлашди.
Мулоқотлар сўнгида “Навоийуран” ДК раҳбарияти меҳмонларнинг таклифларини ўрганиб чиқиб, қисқа муддатларда яна учрашиш бўйича келишиб олишди.
Шу куни япониялик мутахассислар “Зафаробод” кон бошқармасига қарашли
2-Геотехнологик конининг 13-локал сорбцион қурилмаси фаолияти ва табиий уран қазиб олиш жараёнлари билан яқиндан танишишди.
