Ең қызықты 5 кітап
Кітап — ақылына ақы сұрамайтын ең құнды қазына. Ал оның орасан зор пайдасы мен баға жетпес құндылығы айтпасан да мәлім. Ендеше кітап сүйер қауымды осы бір бес кітаптың жаңа әлеміне шақыруға асықпыз!
Балалық шаққа саяхат
Балалар әдебиетінде шоқтығы биік, қазақтың талантты жазушыларының бірі Бердібек Соқпақбаев бұл туындысында қуынышы, қайғысы мен ең қызықты сәттері қатар өрілген балалық шағын еш өзгеріссіз қағаз бетіне түсіріп, сол бір күндерге деген ыстық сағынышын арқау ете білген. Қисынымен қиыстырып суреттелген автордың қиын қыстауы мен балдай тәтті кездері әрбір оқырманды бірде күлдіріп, бірде жылатып қоймайтыны анық. Ал сіз Бердібек атамыздың балалық әлеміне сапар шегуге дайынсыз ба?
Махаббат қызық мол жылдар
Әзілхан Нұршайықовтың бұл шығармасы әдебиет әлемінде мәңгі тақырыпқа айналған махаббат мәселесін арқау етеді. Соғыстан аман-сау оралған Ербол есімді студенттің бастан кешірген оқиғалары, оның Меңтай қызға ғашық болып, студенттік өмірдің бар қызығымен бөлісуі бүгінгі күннің балғын оқырманын бей-жай қалдырмайтыны сөзсіз.
Аққан жұлдыз
Бұл екі кітаптан тұратын Сәбит Мұқановтың романы қазақтың атаулы туындыларының қатарында. Қиын заманда өмір сүріп, халқы үшін қызмет еткен Шоқан Уәлихановтың қысқа, бірақ еске алуға тұрарлық өмір жолын баяндайтын шығарманы әрбір адам оқуы тиіс.
Ұшқан ұя
Шығармада еліміздің салт-дәстүрлері мен ұлттық болмысы айқын көрініс тауып, нағыз патриоттық тәрбие іргетасы қаланады. Жастайынан әжесінен бір елі қалмай, әке кеңесін жадына сақтаған ұлы батыр Бауыржан Момышұлының басынан өткерген сан алуан оқиғаларымен сіз де таныс болуға асығыңыз!
Том Сойердің басынан кешкендері
Бұл классикалық туындының балалар әдебиетіндегі орны ерекше, балалардың балдай тәтті мінезі мен ішкі дүниесін жақсы сезіне білген Марк Твен әр баланың сүйікті қаламгеріне айналды. Басты кейіпкер Том Сойердің бастан кешкен ең қызықты оқиғалары мен ақылға сыймас қылықтары үлкен кішіні тәнті етпек!
Мақала авторы: Абибулла Аружан
NIS Press — это школьная газета НИШ ФМН г. Алматы, Казахстан. Данная статья была опубликована в выпуске газеты 1 февраля 2021 г.
Следите за новостями газеты в нашем Instagram-аккаунте. Также можете ознакомиться со всей информацией о газете в нашем Telegram-канале.
Все выпуски газеты доступны для скачивания в нашем Telegram-канале и через Google Диск.