ЖҮЙРІК ЖАСТАР ЖАРЫСТА
“Бес бастама олимпиадасының” Жоғары оқу орындары студент-жастарының арасында өткізілетін жарыстардың Республикалық басқышына қатысу үшін Гүлстан мемлекеттік университетінің ұжымы Бұхара облысына барды.
Үстіміздегі жылғы сентябрь-октябрь айларында “Бес бастама олимпиадасының” 5 түрлі бағыты бойынша Сырдария облысындағы Жоғары оқу орындары студенттерінің қатысуымен қызықты жарыстар ұйымдастырылды. Оған студенттер де белсенді қатысып, өздерінің білімге, спортқа деген құштарлығын ерекше байқатты.
Облыстағы жарыстардың қорытынды нәтижелеріне орай Гүлстан мемлекеттік университетінің ұжымы Бұхара облысына жолдама алды. Оларды шығарып салу рәсіміне университет ректоры, техника ғылымдарының докторы, профессор М.Т.Ходжиев қатысып, өз пікірлерін, тілектерін айтып, ұжымға сәт сапар тіледі.
Соған қоса шара барысында облыстық Жастар саясаты мен спорт басқармасы, Өзбекстан жастар одағының Гүлстан мемлекеттік университетінің бастауыш ұйымы да ұжымға сәттілік тіледі.
Иә, соңғы кездері білім беру ошақтарында біліммен қоса спортты дамытуға да ерекше көңіл бөлініп келе жатыр. Соның нәтижесі болар, қазірде жастарымыз әр сала бойынша еліміздің абыройын асқақтатып отыр. Біз жарысқа қатысып отырған сырдариялық жастарға биік белестен көрінуін тілейміз.