Окс цивилизацияси бўйича муҳим тадқиқот
Боқиев А., Шайдуллаев А., Йўлдошева З. Окс цивилизацияси. Тошкент, “Янги нашр”, 2015. - 176 бет.
Мустақиллик йилларида Ўзбекистоннинг қадимги давр тарихини ўрганишга бўлган эътибор янада кучайди. Ана шундай тадқиқотлардан бири, Термиз давлат университети ва Ўзбекистон Миллий университети ёш тадқиқотчилари Анвар Боқиев, Алишер Шайдуллаев ва Зубайда Йўлдошевалар муаллифлигида чоп этилган “Окс цивилизацияси” монографиясидир. Монографияга Ўрта Осиё археологиясининг забардаст олими, профессор А.С. Сагдуллаев муҳаррирлик қилган, тарих фанлари докторлари Б. Эшов ва Ў. Мавлоновлар тақризчи сифатида иштирок этишган.
Монография кириш, 3 боб, хулоса қисмларидан иборат бўлиб, унга адабиётлар рўйхати ва шартли белгилар илова қилинган. Кириш қисмида Ўзбекистон тарихини даврлаштиришда цивилизацион ёндошувни таклиф этишган, Бақтрия ва Марғиёнада бронза даврида шаклланган цивилизацияни “Окс цивилизацияси” деб аташган. Ўрта Осиёнинг жанубий минтақалари ва Шимолий Афғонистонда XX асрнинг 50-60 йилларидан бошлаб ўтказилган археологик қазишмалар шуни кўрсатдики, бу ҳудудларда мил.ав. III–II минг йилликларда Қадимги Шарқ цивилизация марказларидан қолишмайдиган маданият ўчоқлари мавжуд бўлган.
Монография муаллифлари цивилизациянинг номланиши масаласида фикр билдириб, бу ҳудудга ва цивилизацияга нисбатан турли атамалар қўлланилаётганлигини таъкидлашган. К. Ламберг-Карловский “Окс цивилизацияси” (Lamberg-Karlovsky C.C. 1994, 398-405), М. Тоси ва Т. Ширинов “Турон цивилизацияси” (Tosi, 1977) А.А. Аскаров ва Т.Шириновлар НИКО (Аскаров, Ширинов, 1993. С. 60-61), В.И. Сарианиди БМАК ёки БМКК (Сарианиди, 2003), В.М. Массон эса “протобактрия”, “Қадимги Шарқ типидаги цивилизация”, “миниатюрадаги Месопотамия” ибораларини қўллашган.
Е.В. Антонова тадқиқотларида БМАК, “Окс цивилизацияси”, ёки “Ташқи Эрон” (Антонова, 2013. С. 9-16; Антонова, 2014, С.12-13), П. Амье тадқиқотларида эса “Ташқи Эрон” атамаси ишлатилиши билан бирга “Бақтрия цивилизациясини” “Ташқи Эрон” га тегишли деб ҳисоблайди (Amiet, 1986, Р.152). Ш.Б. Шайдуллаев ўз тадқиқотларида “Окс цивилизацияси” атамасини ишлатиш билан бирга “Ташқи Эрон” назариясини танқид остига олган (Шайдуллаев, 2014). Монография муаллифлари эса мазкур цивилизациянинг “Окс цивилизацияси” деб номланишини тарихий жиҳатдан асослашган.
Монографиянинг I боби “Ўзбекистон тарихини ўрганишда цивилизацион қарашларнинг шаклланиши” деб номланади. Ушбу бобда Ўзбекистон тарихини даврлаштиришда цивилизацион қарашларларнинг шаклланиши ҳамда Окс цивилизацияси ҳақида умумий тушунчалар берилган.
Ўзбекистон тарихини даврлаштиришда дастлабки қалдирғочлар бўлган В.В. Бартольд, С.П. Толстов. В.В. Струвенинг хизматлари, шунингдек формацион қарашлар ҳақида фикрлар билдирилган. Сўнгги йилларда академик А.А. Асқаровнинг Ўзбекистон тарихини даврлаштириш масаласидаги тадқиқотларига фикр ва мулоҳазалар билдирилган (Асқаров А. 2007; Асқаров, 2015).
Монографияда “... тарихни формацион даврлаштириш Осиё, жумладан Ўрта Осиё халқлари тарихи учун мос келмаслиги ғоянинг туғилган давридан бошлаб маълум бўлган” (18-бет), “Фикримизча, тарихни даврлаштиришда энг мақбул вариантлардан бири унга цивилизацион ёндашишдир” (19-бет) деб фикр билдирилади. Бизнинг фикримизча, тарихни даврлаштиришда формацион ва цивилизацион ёндашувни ўзаро қиёслаш ва таққослашда И.В. Пьянковнинг тадқиқотлари эътиборга моликдир (Пьянков, 2002, С. 7-20; Пьянков, 2013, С. 79-87;). Жумладан, И.В. Пьянков ўз тадқиқотларида, дунё тарихида қадимги давр билан ўрта асрлар даври чегараси нечанчи асрга тўғри келишини формацион ва цивилизацион ёндашувлар асосида кўриб чиққан.
Монографияда шунингдек, цивилизация хусусиятлари бўйича Г. Чайльд, А. Тойнби, К. Ренфрю қарашлари, А. Асқаров ва А. Сагдуллаев даврлаштиришлари, илк давлатлар типологияси бўйича Э.В. Ртвеладзе, Ш.Б. Шайдуллаев ва бошқа олимларнинг фикрлари келтирилган (19-37 бетлар).
Кейинги параграф “Окс цивилизацияси ҳақида умумий тушунчалар” деб номланади (37-55 бетлар). Мазкур қисмда муаллифлар цивилизация турларини (“ўрмон цивилизацияси”, “пайконлар цивилизацияси”, “шаҳар цивилизацияси”) келтириб ўтишган. Ўрта Осиёда илк цивилизация бронза давридан бошлаб вужудга келишини айтиб ўтишган. Муаллифлар Окс цивилизацияси аҳолисининг Марказий Осиё халқлари тараққиётига қўшган ҳиссасини келтиришган. Жумладан, Окс цивилизацияси аҳолиси марказлашган динга асос солган деган фикрга келишган. Ҳақиқатдан ҳам, Жарқўтон, Гонур, Тўғолоқ ва Дашли ёдгорликларида монументал ибодатхоналарнинг ўрганилиши орқали шундай хулосага келишган. Аксарият олимлар ушбу динни илк зардуштийлик характеридаги ёки унинг элементлари мавжуд бўлган дин сифатида баҳолашади (Абдуллаев К.,2009).
Тўғолоқ-21 олов ибодатхонаси В.И. Сарианиди томонидан “протозардуштийлик” ибодатхонаси деб баҳоланган бўлсада, Россиянинг “Вестник древней истории” журналида кўплаб тарихчи ва археологлар ( В.И. Сарианиди, Ф. Грене, В.А. Гаибов, Г.А. Кошеленко, В.А. Лившиц, И.М. Стеблин-Каменский, Б.А. Литвинский, И.В. Пьянков, М.А. Дандамаев, В.А. Иванов, Г. Ньоли) бу масала атрофида баҳс олиб боришган (Гаибов, Кошеленко, 1989; Мейтарчиян, 2013). В.И. Сарианиди томонидан таклиф этилган “протозороастризм” атамаси В.А. Лившиц ва И.М. Стеблин-Каменский томонидан маъқулланмаган.
Шунингдек, монографияда Окс цивилизацияси аҳолисининг илк шаҳар маданиятиятига асос солиши, шаҳар-давлатнинг вужудга келиши, аҳоли дифференциясининг бўлиши, кулолчиликдаги, металлсозликликдаги ютуқлар тилга олинган (41-46 бетлар). Меъморчиликдаги симметрия, санъатдаги ютуқлар, халқаро ва маданий алоқалар, зоолатрик дунёқарашларнинг мавжудлиги, глиптика соҳаси муаллифлар томонидан муҳокама этилган.
Монографиянинг II боби “Окс цивилизациясининг пайдо бўлиши, етилиши ва ривожланиш жараёнлари” деб номланиб, мазкур бобда Окс цивилизациясининг пайдо бўлишида миграцияларнинг ўрни, унинг маҳаллий илдизлари ва ижтимоий характери ёритилган. Иккинчи бобнинг биринчи қисми “Окс цивилизациясининг пайдо бўлишида миграцияларнинг ўрни” деб номланган. Мазкур қисмда цивилизацияларнинг шаклланиши ва ривожланиши бўйича файласуф, социолог ва тарихчи олимларнинг (М. Вебер, А. Тойнби, О. Шпенглер, Ф. Бродел, Ж.М. Гофф, Н.Я. Данилевский, К. Леонтьев, П. Сорокин, Л.Н. Гумилев, И.М. Дьяконов, Ю.В. Яковец) фикрлари келтирилган. Ўрта Осиё бронза даври учун миграцияларнинг муҳим роль ўйнаганлиги ва миграцияларнинг уч хилдаги характери очиб берилган. Милоддан аввалги III минг йиллик охиридан Ўрта Осиёда ҳар хил маданият соҳибларининг, айниқса индоарийлар миграциясининг кучайиши айтилган (60 бет). Жанубий Туркманистондаги 8 та, Жанубий Бақтриядаги 4 та деҳқончилик воҳалари, Сурхон воҳасидаги ёдгорликлар характерланиб, умумий Окс цивилизациясига жамланган.
Монографияда Окс цивилизациясига миграция қилган аҳолилар бўйича В.М. Массон, В.И. Сарианиди, А.А. Асқаров фикрлари келтирилиб ўтилган холос. Муаллифлар П. Амье (Amiet, 1986), В.Д. Рузанов (Рузанов, 2011а; Рузанов, 2011б; Рузанов, 2012;), В.А. Алекшин (Алёкшин, 1980) каби тадқиқотчиларнинг Ўрта Осиё бронза даврида аҳоли миграциялари йўллари ҳақидаги фикрлари келтирилганда, ўқувчига миграция ҳақида кўпроқ маълумот етказган бўлар эди. Масалан, Е.Е. Кузьмина Окс цивилизацияси асосини маҳаллий илдизларга, иккинчи компонент сифатида Элам маданияти миграциясига боғлайди (Кузьмина, 2008, С.48).
Окс цивилизациясига хос бўлган 16 та характерли белгининг Қадимги Шарқ марказлари билан таққосланиши муаллифларнинг катта ютуғи десак муболаға бўлмайди (65-68 бетлар).
II бобнинг иккинчи қисми “Окс цивилизациясининг маҳаллий илдизлари” деб номланган ва мавзу Жанубий Туркманистондаги Олтинтепа мисолида ечиб берилган. Олтинтепада ривожланган монументал меъморчилик, ҳунармандчилик, тоштарошлик, кулолчилик каби анъаналарга асос солиниши муаллифлар томонидан айнан Окс цивилизациясининг маҳаллий илдизлари сифатида тилга олинади. Тадқиқотчиларнинг Окс цивилизацияси аҳолисининг энеолит давридаги яратувчанлик, ижодкорлик хусусиятларининг 11 та белгисининг кўрсатиб берилиши айниқса ютуқли бўлган (83-бет).
Муаллифларнинг таъкидлашича Окс цивилизацияси фортификациясидаги лабиринт тизим, сопол буюмлар гардишидаги зооморф терракоталар, миниатюра шаклли база колонналар, муҳрлардаги ўзгаришлар каби инновациялар Қадимги Шарқ халқларининг миграцияси излари ҳисобланади.
Монографиянинг II боб учинчи қисми “Окс цивилизациясининг ижтимоий характери” деб номланади. Тадқиқотчилар томонидан илк цивилизацияга оид бўлган хилма-хил 14 та атамалар (“илк цивилизация”, “бирламчи цивилизация” ва ҳ.к.) келтириб ўтилади (89-90 бб.). Шунингдек, Окс цивилизацияси ҳудудида шаклланган илк давлатлар учун тадқиқотчилар томонидан “чифдом”, “карликовое”, “воҳа-давлатлар”, “митти давлатлар”, “ном” типидаги “шаҳар-давлат” каби атамалар ишлатилган. Муаллифлар таҳлилига кўра, Окс цивилизацияси илк давлатларига нисбатан “шаҳар-давлат” атамасининг ишлатилиши илмий асосга эга. Муаллифлар томонидан илмий адабиётларда жамоаларга нисбатан қўлланилаётган 19 та атама жадвал тариқасида келтирилган (100 б.). Окс цивилизацияси жамоасига нисбатан “илк умумлашган жамоа” иборасини қўллаш таклиф этилган. Окс цивилизациясига ижодкорлик хусусияти характерли эканлиги белгиланган.
Монографиянинг III боби “Окс цивизациясининг ёзув тизими” деб номланган бўлиб, Окс цивилизациясининг ашёларга асосланган ёзув усуллари, пиктографик белгили ёзувлари ва уларнинг дунё ёзувлари билан таққослаш натижалари келтириб ўтилади.
Тарих ва археология фанидаги янги манбалар, уларнинг ўрганилиши кўплаб илмий кашфиётларга олиб келди. Сўнгги йилларда Окс цивилизацияси ҳудудида пиктографик услубдаги ёзувнинг мавжудлиги ҳақида гипотезалар академик А. Асқаров ва Ш. Шайдуллаев томонидан ўртага ташланди ва илмий асослаб берилди (Асқаров, 2013. Б. 13-38; Аскаров, 2013. С.43-58; Шайдуллаев, 2004. Б. 56-57; Чориев, Шайдуллаев, Аннаев, 2007; Шайдуллаев, 2003. Б. 35-38). Муаллифлар айнан ана шу ғояларни ривожлантириб, Окс цивилизацияси пиктографик белгили ёзув тизимини ўрганиб, таҳлил қилишган (121-138 бб.). Айтиб ўтиш жоизки, академик А.А. Асқаров тадқиқотлари ҳам Окс цивилизация ёзувлари таҳлилида алоҳида ўрин тутади. А.А. Асқаров томонидан Окс цивилизацияси ёзувлари тўғрисидаги мақола 2013 йилда Германияда нашр этилди ва бу гипотеза жаҳон илм майдонига чиқарилди (Аскаров, 2013. С.43-58). Мазкур мақолада пиктографик белгилар 34 типга бўлинган 83 белги кўринишида таснифланган (Аскаров, 2013. С.54). Муаллифлар шу мақоладан ҳам фойдаланганларида монографиянинг манбавий асосини янада мустаҳкамлашган бўлар эди.
Муаллифлар томонидан ўрганилган Окс цивилизацияси ашёвий ёзувлари ўзига хос янгилик бўлиб, бу ёзув хусусиятлари антик маълумотлар (Геродот) ўрта аср форс ёзма манбалари ва этнографик маълумотлар асосида ўрганилган. Бобнинг учинчи қисмида Окс пиктографияси дунё ёзувлари билан таққослаш натижалари келтирилган. Эрондаги Шахдод ёдгорлигидаги пиктографик белгилар ва қисман Миср ёзувлари билан солиштирилган
Олимлар томонидан сўнгги йилларда Окс цивилизацияси ҳудуди Харали (Шайдуллаев, 2013) деб аталганлиги ёки бу ҳудудда Мархаши ёки Барахши подшолиги (Франкфор, 2006. С.193-194; Francfort, Tremblay, 2010. P. 51-224) мавжуд бўлган деган фаразлар ўртага ташланди. Албатта, бу гипотезалар илмий жамоатчилик томонидан тўлиқ қабул қилинмаётган бўлса-да, Окс цивилизациясининг ўрганилиш тарихи сифатида монографияга киритилиши лозим эди.
Франциялик ёш олима Элиз Люно (Elise Luneau) тадқиқотларида Окс цивилизациясини ўрганиш асосий ўрин тутади. 2010 йилда А.П. Франкфорт раҳбарлигида докторлик ишини тайёрлаган олиманинг тадқиқоти 614 бетни ташкил этади. Мазкур тадқиқотлар француз тилида бўлганлиги учунми, муаллифлар ушбу тадқиқотга мурожаат этишмаган, ваҳоланки, ундан Окс цивилизацияси инқирози даврини ёритишда асосий маълумотларни олиш мумкин эди (Luneau Elise, 2010., Luneau Elise, 2015a., Luneau Elise, 2015b.)
Монографиянинг хулоса қисмида муаллифлар умумий мазмундан келиб чиқиб, Окс цивилизациясининг маданий тараққиётида эришган ютуқларини баён этишган.
Монографияда Окс цивилизациясига ҳозирги замон фани ютуқлари даражасида таъриф берилган ва Қадимги Шарқ цивилизациясининг янги ўчоғи сифатида илмий асосланган. Кўрсатилган камчиликлар монографиянинг илмий даражасини пасайтирмайди, биз монография муаллифларига миннатдорчилик билдириб, янги тадқиқотлар кутиб қоламиз.
Одилжон Хамидов
Термиз шаҳри. Термиз давлат университети.
Адабиётлар:
1. Абдуллаев К., 2009. Культ хаомы в древней Центральной Азии. МИЦАИ, Самарканд, -120 с.
2. Алёкшин В.А., 1980. К проблеме генетической связи южнотуркменистанских комплексов эпохи бронзы // КСИА. Вып. 161.М., 1980.
3. Антонова Е.В., 2013. Арии и Бактрийско-маргианский археологический комплекс / Иранский мир II-I тыс. до н. э. Материалы международной научной конференции, посвященной памяти Э.А. Грантовского и Д.С. Раевского. Выпуск VI. ИВ РАН. Москва, 2013. С. 9-16
4. Аскаров А.А., 2013. Была ли пиктографическая письменность в культуре Сапалли (находки, гипотезы, предположения) / Согдийский сборник, LAP LAMBERT Academic Publishing, 2013. С. 43-58
5. Асқаров А., 2013. Сополли маданияти пиктографик ёзув белгиларини ўқишдаги дастлабки изланишлар // Марказий Осиё тарихининг манбашунослиги ва тарихнавислиги масалалари. Республика V илмий-назарий конференцияси материаллари. 5-илмий тўплам. 2-қисм (Тошкент давлат шарқшунослик институти). –Т., 2013.- 12-38 б.
6. Гаибов В.А., Кошеленко Г.А.,1989. Тоголок 21 и проблемы религиозной истории древней Маргианы // ВДИ. 1989, №1, сc. 171-173.
7. Кузьмина Е.Е., 2008. Арии – путь на юг. –М., 2008.
8. Мейтарчиян М.Б., 2013. Культ огня в Бактрии / Иранский мир II-I тыс. до н. э. Материалы международной научной конференции, посвященной памяти Э.А. Грантовского и Д.С. Раевского. Выпуск VI. ИВ РАН. Москва, 2013. С. 49-54.
9. Пьянков И.В., 2002. К вопросу о формационном и цивилизационном подходах // Метаморфозы истории. Вып. 2. С. 7–20.
10. Пьянков И.В., 2013. Когда и как закончилась “древность” во всемирной истории // Метаморфозы истории. Вып. 4. С. 79–87.
11. Рузанов В.Д., 2011а. Миграция племен в Узбекистане в эпоху палеометалла (Часть 1) / Археология Узбекистана №1(2)-2011, С.25-39.
12. Рузанов В.Д., 2011б. Миграция племен в Узбекистане в эпоху палеометалла (Часть 2) / Археология Узбекистана №2(3)-2011, С.16-26.
13. Рузанов В.Д., 2012. Миграция племен в Узбекистане в эпоху палеометалла (Часть 3) / Археология Узбекистана №1(4)-2012, С.36-49.
14. Сарианиди Б.И., 2003. Афганистан // История человечества. Том II. III тысячелетие до н.э. – VII век до н.э. Под редакцией А.Х. Дани и Ж.-П. Моэна. ЮНЕСКО, Москва. -2003. С. 237-242.
15. Франкфор А.-П., 2006. Цивилизация БМАК и местонахождение Мархаши около 2300-1800 гг. до н.э. / Древняя Маргиана – новый центр мировой цивилизации. Материалы Международной научной конференции, 14-16 ноября, 2006 года. Мари. – 2006. С.193-194.
16. Чориев З.У., Шайдуллаев Ш.Б., Аннаев Т.Ж., 2007. Ўзбекистон ҳудудида ёзувнинг пайдо бўлиши ва тараққиёти. – Тошкент: Янги аср авлоди, 2007. – 96 б.
17. Шайдуллаев Ш.Б., 2003. Сополли маданиятининг пиктографик белги-ёзувлари // Ўзбекистонда ижтимоий фикр. Тошкент, -2003, №2. Б. 35-38.
18. Шайдуллаев Ш.Б., 2004. Ўғирдаги битиклар ёхуд ёзувнинг пайдо бўлишига доир муҳим янгилик // Тафаккур. №4, 2004. Б. 56-57.
19. Шайдуллаев Ш.Б., 2013. Харали // “Ўзбекистонда ижтимоий-иқтисодий ва маданий ҳаёт: трансформацион жараёнлар”. Республика илмий анжумани. Илмий мақолалар тўплами. Тошкент, 2013. 17-19 бб.
20. Шайдуллаев Ш.Б., 2014. “Ташқи Эрон” назариясини танқид // “Амударё цивилизацияси жаҳон маданияти тизимида”. Халқаро илмий амалий конференция. Термиз шаҳри. 2014 йил. 16 сентябр. Термиз. – 2014. Б. 12
21. Amiet, 1986. – Amiet P. L΄âge des échanges inter-iraniens 3500–1700 avant J.-C. P. 1986.
22. Francfort H.-P., Tremblay X., 2010. –Marhaši et la civilization de l΄Oxus // Iranica Antiqua. Vol. XLV. P. 51-224
23. Luneau Elise, 2010. L ‘age deu Bronze final en Asie central meridionale (1750-1500/1450 avant N.E.) : la fin de la civilisation de l’Oxus. Thèse de doctorat présentée et soutenue publiquement le 27 novembre 2010. 614 pages
24. Luneau Elise, 2015a. La fin de la civilisation de l’Oxus : Transformations et recompositions des sociétés de l’âge du bronze final en Asie centrale méridionale (1800-1500/1400 avant n.è.). Paris, De Boccard. 508 pages http://ifeac.hypotheses.org/2135
25. Luneau Elise, 2015b. A new Assessment of the End of the Oxus Civilization (Southern Central Asia, ca. 1750-1500 / 1400 BCE): Overview of the Transformation of the Society // Broadening Horizons 4. A Conference of young researchers working in the Ancient Near East, Egypt and Central Asia, University of Torino, October 2011. BAR International Series 2698. - 2015
26. Tosi M. 1977. The Archaeological Evidence for Protostate Structures in Eastern Iran and Central Asia at the End of the 3rd Millennium B.C. Le plateau iranien et centrale des origines a la conquete islamique. CNRS. Paris.