Молитвы Благодарственныя по Святом Причащении
Священник Петр Хамзин
Егда же получиши дражайшаго приобщения
Животворных и тайных Дарований,
Воспой абие, и благодари зело
И сия тепле от души Богови глаголи:
Молитва 1. Святаго Великаго Василия.
Благодарю Тя, Господи Боже мой, яко не отринул мя еси грешнаго, но общника мя быти Святынь Твоих сподобил еси. Благодарю Тя, яко мене недостойнаго причаститися Пречистых Твоих и Небесных Даров сподобил еси. Но Владыко Человеколюбче, нас ради умерый же и воскресый, и даровавый нам Страшная Сия и Животворящая Таинства, во благодеяния и освящение душ и телес наших, даждь быти сим и мне во исцеление души же и тела, во отгнание всякаго сопротивнаго, в просвещению очию сердца моего, в мир душевных моих сил, в веру непостыдну, в любовь нелицемерну, во исполнение премудрости, в соблюдение заповедей Твоих, в приложение Божественныя Твоея благодати, и Твоего Царствия присвоение, да во святыни Твоей теми сохраняем, Твою благодать поминаю всегда, и не ктому себе живу, но Тебе, нашему Владыце и Благодетелю, и тако сего жития изшед о надежди живота вечнаго, в присносущный достигну покой, идеже празднующих глас непрестанный, и безконечная сладость зрящих Твоего лица доброту неизреченную. Ты бо еси истинное желание, и неизреченное веселие любящих Тя, Христе Боже наш, и Тя поет вся тварь во веки.
Молитва 2. Святаго Иоанна Златоустаго.
Благодарю Тя, Человеколюбче Господи, яко многия Твоея ради благости утерпе причастника мя быти Пречистому Твоему Телу, и Честныя Крови, и не возгнушался яко осквернена, ниже яко приятию Святынь Твоих недостойна, невидимою Божественною силою отрину. Но благоволил еси мене, грешнаго, Безсмертною Твоею напитатися Трапезою. Юже Животворную Твою благодать, неизменну и неотъемлему в смиренной моей души соблюди. И просвещение Твое неугасимо от мене сотвори, просвещая мое всякое разумение и всякое чувство, неприкосновенна мя соблюдая, и непреткновенна от мрачнаго греха, еже славити и благодарити Тя всегда, и по Твоему ходити хотению, во вся дни живота моего, молитвами Пречистыя Владычицы нашея Богородицы и Приснодевы Марии, и Безплотных Твоих служителей, и всех Святых, иже от века Тебе благоугодивших, Аминь.
Молитва 3. Святаго Иоанна Златоустаго.
Владыко Христе Боже, Царю веков и Содетелю всех, благодарю Тя о всех, яже ми еси подал благих, и о причащении Пречистых и Животворящих Твоих Таинств. Молю убо Тя, Блаже и Человеколюбче, сохрани мя под кровом Твоим, и в сени крылу Твоею. И даруй ми чистою совестию, даже до последнего моего издыхания, достойно причащатися Святынь Твоих, во оставление грехов, и в жизнь вечную. Ты бо еси Хлеб Животный, Источник святыни, Податель благих, и Тебе славу возсылаем, со Отцем и Святым Духом, ныне и присно, и во веки веков, аминь.
Молитва 4. Святаго Иоанна Златоустаго.
Пречистаго Твоего Тела, и Честныя Твоея Крове тайно сподоблься быти спричастник, Христе Боже, воспеваю и благословлю, поклоняюся и славлю, и величаю спасения Твоя Господи, ныне и всегда, и во веки веков, Аминь.
Молитва 5. Святаго Иоанна Дамаскина.
Боже, Боже мой, Непостоянный и Невидимый Огню, иже Ангелы Своя огнь палящ соделовая, Иже несказанною Твоею любовию предал ми еси в снедь Божественную Твою Плоть, причастника мя приемый Своего Божества, ради приобщения Пречистаго Твоего Тела, и Честныя Твоея Крове, пройди все мое тело и дух, во вся моя кости и мозги, грехи моя попаляя, душу мою просвещая, ум мой уясняя, тело освящая, и обитель сотворяя во мне с Благословенным Отцем Своим, яко да и аз буду в Тебе присно, молитвами Пречистыя Твоея Матере и всех Святых Твоих, Аминь.
Молитва 6. Святаго Кирилла Александрийскаго.
Тело Твое Святое, Господи Иисусе Христе Боже наш, да будет ми в живот вечный, и Кровь Твоя Честная во оставление грехов: буди же ми благодарение сие в радость, здравие и веселие: в страшное же и второе пришествие Твое сподоби мя грешнаго стати одесную славы Твоея, молитвами Пречистыя Твоея Матери, и всех Святых.
Молитва 7. Святаго Симеона Метафраста.
Давый пищу мне Плоть Твою волею, огнь Сый и опаляяй недостойныя, да не опалиши мене, Содетелю мой: паче же пройди во уды моя, во вся составы, во утробу, в сердце. Попали терние всех моих прегрешений, душу очисти, освяти помышления. Составы утверди с костьми вкупе. Чувств просвети простую пятерицу. Всего мя спригвозди страху Твоему. Присно покрый, соблюди же, и сохрани мя от всякаго дела и слова душетленнаго. Очисти, и омый, и украси мя: удобри, вразуми, и просвети мя. Покажи мя Твое селение Единаго Духа, и не ктому селение греха. Да яко Твоего дому входом причащения, яко огня мене бежит всяк злодей, всяка страсть. Молитвенники Тебе приношу вся Святыя, чиноначалия же безплотных, Предтечу Твоего, премудрыя апостолы, к сим же Твою Нескверную, Чистую Матерь. Ихже мольбы, Благоутробне, приими, Христе мой, и сыном света соделай Твоего служителя. Ты бо еси освящение, и Единый наших Блаже душ и Светлость. И Тебе лепоподобно яко Богу и Владыце славу вси возсылаем на всяк день.
Молитва 8. К Пресвятей Богородице.
Пресвятая Владычице, Богородице, свете помраченныя моея души, надеждо, покрове, прибежище, утешение, радование мое, благодарю Тя, яко сподобила мя еси недостойнаго, причастника быти Пречистаго Тела, и Честныя Крове Сына Твоего. Но рождшая Истинный Свет, просвети моя умныя очи сердца: яже источник безсмертия рождшая, оживотвори мя умерщвленнаго грехом: яже милостиваго Бога любоблагоутробная Мати, помилуй мя, и даждь ми умиление, и сокрушение в сердце моем, и смирение в мыслех моих, и воззвание в пленениих помышлений моих: и сподоби мя до последняго издыхания, неосужденно приимати Пречистых Таин освящение, по исцеление же души и тела: и подаждь ми слезы покаяния и исповедания, во еже пети и славити Тя во вся дни живота моего, яко благословенна и препрославленна еси во веки, аминь.
Молитва 9. Святаго Германа Пресвятей Богородице по Святем Причащении.
О Преблаженная Госпоже Дево Владычице Богородице, умоли Сына Своего, избавитися нам от всякаго зла. Тобою бо, Госпоже, Сына Божия познахом и сподобихомся причастницы быти Честныя и Пречистыя Крове Его и Плоти, чающе доидти Твоими молитвами вечныя жизни, славяще Отца и Сына и Святаго Духа, ныне и присно и во веки веков, Аминь.
Молитва 10.
О Господи Живый, благодарю Тя с трепетом. Естеством бо яко огнь, не опаляеши, но питаеши. Пройди убо сквозе уды моя действенно, и во вся составы, во утробу и сердце. Очисти, отмый всяку скверну, чувств соочищая пяторицу.
Достойно есть:
Трисвятое по Отче наш:
тропари и кондаки настоящему дню и егоже есть обитель
Слава: И ныне:
Вечери Твоея Тайныя днесь...
Господи помилуй, 12 раз.
Иерей глаголет:
Слава Тебе Христе Боже, упование наше, слава Тебе.
Слава: И ныне:
Господи помилуй, трижды, благослови:
И отпуст глаголет сице:
Христос истинный Бог наш, молитвами Пречистыя Своея Матере, иже во святых отец наших Василия Великаго, Иоанна Златоустаго, Кирилла, архиепископа Александрийскаго, Софрония патриарха Иерусалимскаго, Германа, патриарха Царьградскаго, преподобных и Богоносных отец наших Иоанна Дамаскина, Симеона Новаго Богослова, преподобныя матере нашея Марии Египетския, и преподобнаго отца нашего Онуфрия Великаго и всех святых, помилует и спасет нас, яко Благ и Человеколюбец.
Аминь.