Uzmobile Ўзбекистонда биринчи 5G стандартидаги мобил тармоқни ишга туширишни режалаштирмоқда

“Oʻzbektelekom” АЖ Uzmobile филиали журналистларни компания фаолияти билан яқиндан таништириш мақсадида пресс-тур ташкил этди.

Мустақиллик байрами арафасида ташкил этилган пресс-турда дастлаб иштирокчилар учун пойтахтимизнинг диққатга сазовор жойларига экскурсия уюштирилди. Сўнгра журналистлар Uzmobile мобил лабараторияларининг фаолияти, телекоммуникация, операторлик ускуналарининг ишлаши, 2G, 3G, 4G (LTE) технологияларидан фойдаланадиган таянч станцияларининг ускуналари билан яқиндан таништирилди.

– Мазкур ускуналаримиз Финляндиядан келтирилган бўлиб, алоқа сифатини таҳлил қилиш, камчиликларини бартараф этишда фойдаланилади – дейди Uzmobile компанияси тармоқ сифатини таҳлил қилиш ва оптималлаштириш хизмати муҳандиси Нозимжон Аҳмаджонов. – Унинг ёрдамида аҳолидан келиб тушган мурожаатларни ўрганамиз. Қурилмага бир вақтнинг ўзида 27 тагача мобил қурилмани улаб хизмат сифатини текшириш мумкин. Ундан автомашинада кетаётган вақтда ҳам фойдаланиб, алоқа сифатини онлайн кузатиш мумкин. Қурилма ноутбук ва махсус дастурлар орқали ишлайди.

Шунингдек, пресс-турда ОАВ вакиллари учун матбуот анжумани ҳам ташкил этилди. Унда қайд этилишича, “Oʻzbektelekom” АЖ Ўзбекистоннинг барча вилоятлари, Тошкент шаҳри ва Қорақалпоғистон Республикасидаги 478 та қишлоқ аҳоли пунктлари, маҳалла ва қишлоқларда телекоммуникация инфратузилмасини яхшиламоқда.

Бундан ташқари матбуот анжуманида “Oʻzbektelekom” АЖ Uzmobile филиали мутахассислари компания томонидан амалга оширилаётган лойиҳалар ҳақида маълумот берди. 2019 йил давомида Uzmobile 3100 дан ортиқ янги база станцияларини (BS) фойдаланишга топширилди, йил охиригача бу кўрсаткич 3,5 мингдан ошиши режалаштирилмоқда.

Шунингдек, Uzmobile “Обод қишлоқ” давлат дастурини амалга оширишда ҳам фаол иштирок этмоқда ва мазкур дастур доирасида жорий йилда 140 та қишлоқда мобил алоқа ташкил этилади. Компания бугунги кунда тармоқ сифатини яхшилаш бўйича лойиҳалар устида ишлаяпти. Uzmobile Ўзбекистонда биринчи 5G стандартидаги мобил тармоқни ишга туширишни режалаштирмоқда. Компания келгусида оператор тармоқларини ривожлантириш ва инновацион алоқа хизматларини жорий қилади.

Матбуот анжумани якунида журналистлар томонидан компания масъул вакилларига йўлланган саволларига батафсил жавоб берилди ва компания фаолиятини ёритишда ҳамкорлик қилган ОАВ ходимларига ташаккурномалар топширилди.

Инобат Аҳатова, ЎзА

http://www.youtube.com/c/Globalproartcom

https://t.me/joinchat/AAAAADv7jmb79L186FmtuA