Prezident saylawın ótkeriwde koronavirus tarqalıwınıń aldın alıw boyınsha Instrukciya tastıyıqlandı
Bul haqqında Oraylıq saylaw komissiyası málimleme xızmeti xabar berdi. Instrukciyaǵa muwapıq:
● Saylaw okrugleri hám uchastkalarda, dawıs beriw bólmelerinde saylaw komissiyası aǵzaları, saylawshılar, baqlawshılar hám ǴXQ wákilleri: temperaturanı ólshew ushın termometr, pirometr, qorǵanıw nıqabı, bir mártelik medicinalıq qolǵap (saylaw komissiyası aǵzaları ushın), antiseptikalıq suyıqlıq (sanitayzer) sıyaqlı qorǵaw hám profilaktikalıq zatlardan paydalanıwı talap etiledi.
● Saylaw procesi qatnasıwshıları qorǵanıw nıqabınan paydalanıwı, qol berip sálemlesiw yamasa tikkeley kontaktke kirisiwdiń basqa formalarınan saqlanıwı, sociallıq aralıqqa ámel etiwi kerek. Okruglik hám uchastkalıq saylaw komissiyaları ornalasqan imaratlardıń kiriw bóliminde hám dawıs beriw bólmesinde sociallıq aralıqtı saqlaw ushın 1,5-2 metrlik aralıq qashıqlıqtı belgilewshi jáne háreketleniw baǵdarın kórsetiwshi sızıqlar bolıwı zárúr.
● Okruglik hám uchastkalıq saylaw komissiyaları ornalasqan imaratlarǵa biriktirilgen medicina xızmetkeri saylaw komissiyaları imaratlarınıń kiriw bóliminde keliwshilerdiń dene temperaturasın ólsheydi, antiseptikalıq zatlar menen qolların dezinfekciyalaydı hám qorǵanıw nıqabında bolıwın qadaǵalaydı, zárúrlikke qaray qorǵanıw nıqabı beriledi.
● Uchastkalıq saylaw komissiyaları aǵzaları jumıs procesinde jeke qorǵanıw qurallarınan (qorǵanıw nıqabı, antiseptikalıq zatlar) paydalanıwı shárt.
● Saylaw kúni dawıs beriw baslanıwınan keminde altı saat aldın barlıq uchastkalıq saylaw komissiyalarınıń dawıs beriw imaratları hám bólmeleri dezinfekciyalanadı.
● Saylaw uchastkası «qızıl» yamasa «sarı» aymaqqa tuwra kelgen jaǵdayda komissiya aǵzaları jumıs procesi dawamında májbúriy paydalanıwı ushın qorǵanıw quralları menen támiyinlenedi. Oǵan muwapıq, tiyisliligi boyınsha: arnawlı kombinezon, xalat, dem alıw sistemasın qorǵaw ushın – medicinalıq nıqap, kóriw organların qorǵaw ushın – júz ushın plastmassalı nıqap, qollardı qorǵaw ushın – medicinalıq qolǵap, qol hám júz terisin dezinfekciyalaytuǵın zatlar, eritpeler, quramında xlor hám spirt bolǵan zatlar.
● Saylawshılar hám saylaw procesiniń basqa qatnasıwshılarınıń dene temperaturası 37 gradus hám onnan joqarı bolǵan jaǵdayda olar dawıs beriw bólmesine kirgizilmeydi.
● Bunda dene temperaturası 37 gradus hám onnan joqarı bolǵan saylawshılar ushın óz aldına ajıratılǵan orınlarda (imarattıń kiriw bólimi hám basqalar) uchastkalıq saylaw komissiyasınıń eki aǵzası tayarlıǵında kóshpeli saylaw qutıları hám kabinalarınan paydalanǵan halda jasırın dawıs beriw huqıqı támiyinlenedi.
● Koronavirus infekciyasınan úy sharayatında emlenip atırǵan saylawshınıń turǵan (jasaw) ornında dawıs beriw shólkemlestiriledi.
● Saylawshı hám komissiya aǵzaları arasında sociallıq aralıq saqlanǵan halda saylawshınıń shaxsı anıqlanadı, soń komissiya aǵzası saylawshıǵa cellofan paketke salınǵan toplamdı hám qoltańba qoyıwı ushın saylawshılar diziminen kóshirmeni beredi. Saylawshı nıqap hám qolǵaptı taqqan halda saylaw byulletenin alǵanı haqqında saylawshılar dizimi kóshirmesine qoltańbasın qoyadı. Saylawshıǵa jasırın dawıs beriw huqıqı támiyinlenedi. Bunnan soń saylawshı saylaw byulletenin kóshpeli saylaw qutısına taslaydı.
● Koronavirus infekciyasınan stacionar emlew mákemelerinde emlenip atırǵanlar hám usı orınlardıń jumısshı-xızmetkeri bolǵan saylawshılardıń dawıs beriwin shólkemlestiriw ushın usı mákemelerde saylaw uchastkaları dúziliwi múmkin. Jasırın dawıs beriwdi shólkemlestiriw ushın usı kategoriyadaǵı imaratlarda kóshpeli dawıs beriw kabinalarınan paydalanıladı.
● Barlıq dawıs beriw imaratlarında dawıslardı sanap shıǵıwda dáslep komissiya aǵzalarınıń qolları hám dawıs beriw qutıları dezinfekciyalanadı, sońınan sanaw procesin sociallıq aralıqtı saqlaǵan halda ámelge asıradı, bunda sol jerdegi siyasiy partiyalardıń wákilleri, baqlawshılar hám ǵalaba xabar qurallarınıń wákilleri de medicinalıq nıqaptan paydalanıwı jáne sociallıq aralıqqa ámel etiwi kerek.