ГЎДАК РИЗҚИ

Раҳматли отамиз Бошбек Норматов Иккинчи жаҳон уруши қатнашчиси бўлган. Болалигимда у киши одамни титратиб юборадиган бир воқеани онамизга гапириб бергани ҳамон эсимда.

— Вязьма йўналишидаги бир чоғроқ шаҳарчани душмандан озод қилдик, — дея гап бошлади отамиз. — Қаҳратон қиш. Икки қаватли ёғоч уйлар, кўча тўла мурдалар... Бир уйнинг иккинчи қаватига чиқсам, латта-путталар уюми ёнида бир аёл ўлиб ётибди. Битта ҳам душман йўқ — қочиб кетишган, шекилли. Энди ўгирилиб, кетмоқчи эдим, ўлик ёнидаги латта уюми қимирлагандек бўлди. Очиб кўрсам, ё қудратингдан, тирик чақалоқ ўлик онасини эмиб ётибди!.. Деразага югуриб бориб, пастдаги ҳамширани чақирдим. Зудлик билан ҳамшира-ю врачлар етиб келишди.

Ҳайратланарли жойи шундаки, мурда совуқда қотиб қолган бўлса ҳам чақалоқ эмаётган кўкрак юмшоқ ва иссиқ эди, иккинчиси қотиб ётибди! Ҳарбий врачлар ҳам ҳайратда: одам ўлгандан кейин узоғи билан йигирма дақиқадан сўнг организмдаги барча аъзолар ўз фаолиятини тўхтатиши керак-ку!.. Шифокорлар айтишича, бу аёлнинг жони узилганига ўн кун ёки ками билан бир ҳафта бўлган экан!..

Ҳамширалар тезда гўдакнинг таглигини алмаштиришди, қайтадан йўргаклаб, шинелга ўрашди. Орадан кўп вақт ўтгани йўқ, бир пайт қарасак, ҳозиргина чақалоқ эмиб турган қайноқ ва юмшоқ кўкрак иккинчисига ўхшаб совуқда қотиб ётибди. Худди жигаргўшасининг ишончли қўлларга тушганидан хотиржам бўлгандек... Биров гапириб берганида икки дунёда ҳам ишонмасдим, ўз кўзим билан кўрдим, ахир... — деб отамиз ҳикоясини тугатди.

Нима бу? Не синоат, не мўъжизаки, она ўлгандан кейин ҳам юрагининг бир парчасига уммон қадар меҳр, осмон қадар муҳаббат соғинса! Табиат қонунларига бўйсунмайдиган, тиббиёт қонунларини тан олмайдиган ОНА МЕҲРИ олдида бутун борлиқ таъзимда!

драматург, Ўзбекистонда хизмат кўрсатган маданият ходими.