Savollarga javob, onlayn brifing, abituriyent2020

❓ Savol: Abituriyentlar hozirda bitirganlik haqida diplomlarni qo‘lga olgani yo‘q, bu hujjat topshirish uchun to‘sqinlik qilyapti. Agar 20-iyulgacha diplomni olmasa nima bo‘ladi?
✅ Javob: Yurtimizda karantin cheklovlari joriy etilganligi sababli, joriy yil bitiruvchilariga shahodatnoma va diplomlar elektron shaklda yetkazilishi, asl nusxalari esa epidemiologik vaziyat yaxshilanganidan keyin topshirilishi belgilandi.
Joriy yil bitiruvchilariga qulaylik yaratish maqsadida ularning tugatgan ta’lim muassasasi bo‘yicha ma’lumotlari tegishli vazirliklardan, ya’ni, umumta’lim maktablari bitiruvchilarining ma’lumotlari Xalq ta’limi vazirligidan, akademik litsey va kasb-hunar-kollejlari bitiruvchilarining ma’lumotlari Oliy va o‘rta maxsus ta’lim vazirligidan olinmoqda.
Ular ro‘yxatdan o‘tishda tugatgan ta’lim muassasasi ma’lumotlarini kiritmaydi.

❓ Savol: Qizim kasb-hunar kollejini bu yil bitirdi. Diplomiga xato ketgan ekan, uni to‘g‘irlashdi. Ammo onlayn ro‘yxatdan o‘tishda diplomning oldingi xato seriyasi kiritilgan. Diplomning yangi seriyasini kiritish muammo bo‘lyapti.
✅ Javob: Yuqorida aytib o‘tilganidek joriy yil bitiruvchilari ro‘yxatdan o‘tishda tugatgan ta’lim muassasasi ma’lumotlarini kiritmaydi. Chunki ularning ma’lumotlari tegishli vazirliklardan olinmoqda.
Hozirda tugatgan ta’lim muassasasida xatolik mavjud bo‘lgan abituriyentlarning ma’lumotlari tegishli vazirliklar tomonidan tuzatilmoqda.
Ro‘yxatdan o‘tish yakunlangunga qadar mazkur ma’lumotlar Davlat test markazi bazasiga qayta yuklanadi.

❓ Savol: Oliy harbiy ta’lim muassasalariga nomzodlar fanlar ketma-ketligiga mos yana beshta bakalavriat yo‘nalishlari bo‘yicha uchta ta’lim shakli (kunduzgi, kechki, sirtqi)dan istalgan birini tanlashi mumkinmi? Yoki faqat kunduzgi ta’lim bo‘yicha hujjat topshiradimi?
✅ Javob: Davlat komissiyasining 1-son bayoniga muvofiq nomzodlarga oliy harbiy ta’lim muassasalariga o‘qishga kirish bo‘yicha ro‘yxatdan o‘tishda test topshiradigan fanlari majmuasi va ketma-ketligi bir xil bo‘lgan harbiy bo‘lmagan oliy ta’lim muassasalarining beshtagacha bakalavriat ta’lim yo‘nalishlarini tanlash huquqi beriladi.
Bunda nomzodlar beshtagacha bakalavriat ta’lim yo‘nalishlarini uchta ta’lim shakli (kunduzgi, kechki, sirtqi)dan istalgan biri bo‘yicha tanlashlari mumkin.

❓ Savol: Men topshirayotgan yo‘nalishdan faqat ikkitagina universitet chiqayabdi qolganlari chiqmayabdi, nima qilishim kerak? ✅ Javob: Davlat komissiyasining 1-son bayoni bilan 2020-2021-o‘quv yilida O‘zbekiston Respublikasi oliy ta’lim muassasalarining bakalavriatiga davlat buyurtmasi asosida o‘qishga qabul qilish parametrlari ta’lim shakli, ta’lim yo‘nalishlari va o‘qitish tillari bo‘yicha taqsimlangan.
Abitur.dtm.uz saytida abituriyentlarni onlayn ro‘yxatga olish mazkur qabul parametrlari asosida amalga oshiriladi.
Bunda oliy ta’lim muassasasi uchun qabul parametrlari ajratilgan bo‘lsa, dasturda avtomatik chiqadi.
Agar oliy ta’lim muassasasi uchun qabul parametrlari ajratilmagan bo‘lsa, dasturda chiqmaydi.

❓ Savol: Otasi yo‘q, onasi bilan yog‘iz yashaydigan yoshlarga nisbatan imtiyozlar bormi? Savol: Mening ota-onam vafot etishgan. Menga imtiyoz bormi? ✅ Javob: O‘zbekiston Respublikasi Prezidentining 2019-yil 22-apreldagi
PQ-4296-son “Bola huquqlari kafolatlarini yanada kuchaytirishga oid qo‘shimcha chora-tadbirlar to‘g‘risida” qaroriga asosan oliy ta’lim muassasalariga abituriyentlarni qabul qilishning umumiy sonidan «Mehribonlik» uyi va Bolalar shaharchasining bitiruvchilari bo‘lgan chin yetimlar uchun qo‘shimcha ravishda bir foizgacha davlat granti asosidagi qabul kvotalari ajratiladi.
Shuningdek, ular test sinovlari uchun to‘lovdan ham ozod etilgan.
Agar ular «Mehribonlik» uyi yoki Bolalar shaharchasining bitiruvchilari bo‘lsa, mazkur imtiyozlardan foydalanishlari mumkin.

❓ Savol: Men IELTS dan 4 ball olganman, imtiyoz sifatida foydalansam bo‘ladimi? ✅ Javob: Vazirlar Mahkamasining 2019-yil 13-maydagi 395-son qaroriga muvofiq test sinovlari (kasbiy (ijodiy) imtihon) majmuasiga chet tili fani kiritilgan barcha bakalavriat ta’lim yo‘nalishlari uchun milliy yoki xalqaro imtihon tizimlari bo‘yicha tilni bilish darajalari B2 va undan yuqori bo‘lgan sertifikatga ega abituriyentlarga ushbu fandan imtihonlarsiz belgilangan maksimal ball beriladi.
Bunda ingliz tilidan maksimal ball berish uchun IELTS 5,5 dan kam bo‘lmasligi lozim.

❓ Savol: Abituriyent maqsadli qabulga topshirsa, lekin unda ichki ishlar farzandlariga beriladigan imtiyozi mavjud bo‘lsa imtiyoz hisobga olinmaydimi? ✅ Javob: Davlat komissiyasining 1-son bayoni bilan ichki ishlar organlarining amaldagi xodimlari farzandlari uchun qo‘shimcha uch foizli davlat granti asosida qabul ko‘rsatkichlari ajratilgan.
Qabul ko‘rsatkichlari oliy ta’lim muassasalari kesimida ajratilgan bo‘lib, abituriyent maqsadli qabulni tanlagan bo‘lsa ham imtiyozi saqlanib qoladi.

❓ Savol: Men bu yil abituriyentman, lekin hozir fuqarolik pasportim yo‘q, yaqindagina 16 yoshga to‘lganlarga 10 kun ichida fuqarolik pasporti berilsin, degan qaror qabul qilingan edi. Pasport stolga borsam, karantin tufayli ishlamayapti, deyishdi. Men nima qilay? ✅ Javob: Davlat komissiyasining 1-son bayoni bilan Ichki ishlar vazirligi tomonidan 2020-2021-o‘quv yilida maktab, akademik litsey hamda kasb-hunar kollejlarining 16 yoshga to‘lgan bitiruvchilari pasport olish uchun murojaat qilganda, ularga navbatlarsiz, belgilangan tartibda pasport berilishi ta’minlanishi belgilangan.
Agar sizda pasport olishda muammolar yuzaga kelayotgan bo‘lsa, Ichki ishlar vazirligining +998712315035 raqamiga qo‘ng‘iroq qilishingiz mumkin.

❓ Savol: Men Qoraqalpog‘iston Respublikasi Qo‘ng‘irot tumanida yashayman. Maktabni bu yil bitirdim. Hozir menda pasport yo‘q. Pasport olishga 5 iyun kuni hujjat topshirdim, hali javobi kelmadi. Nima qilsam bo‘ladi? ✅ Javob: Abituriyentlarda pasport bilan bog‘liq qandaydir muammo bo‘ladigan bo‘lsa, o‘z tumanidagi Migratsiya va fuqarolikni rasmiylashtirish bo‘limiga murojaat qilishlari kerak.
Bundan tashqari, Ichki ishlar vazirligining +998712315035 raqamiga qo‘ng‘iroq qilishlari ham mumkin.

❓ Savol: 6-iyul kuni onlayn hujjat topshirdim. To‘lovni 7-iyul kuni amalga oshirdim. Ro‘yxatga olingan, olinmaganligimni qanday bilsam bo‘ladi? ✅ Javob: To‘lov muvaffaqiyatli amalga oshirilganini “Shaxsiy kabinet”dagi “Qabul-2020” bo‘limiga kirib bilib olish mumkin.
Bunda, abituriyent qayd varaqasining quyi qismida “To‘lovingiz muvaffaqiyatli amalga oshirildi!” degan xabar chiqadi.

❓ Savol: To‘lovni qaysi kungacha amalga oshirish mumkin? ✅ Javob: Abituriyentlar test sinovlari uchun to‘lovni ro‘yxatdan o‘tish yakunlangun (20-iyul)ga qadar amalga oshirishlari lozim.
Belgilangan muddatda to‘lovni amalga oshirmagan abituriyent ro‘yxatdan o‘tmagan hisoblanadi va test sinovlarida ishtirok eta olmaydi.

❓ Savol: Har bir ta’lim yo‘nalishiga qancha odam ro‘yxatdan o‘tganini qanday bilish mumkin? ✅ Javob: Davlat test markazi tomonidan qabul.dtm.uz sayti ishga tushirilgan bo‘lib, mazkur sayt orqali har bir oliy ta’lim muassasasi bo‘yicha yo‘nalishlar kesimida ro‘yxatdan o‘tgan abituriyentlar soni va tanlov ko‘rsatkichini ko‘rish mumkin.

🎓 @TalabaYoshlar - O'zbekiston talabalari sahifasi
https://t.me/joinchat/AAAAAEeANMrRw1QyxjCUCQ