Aлишер Навоий номидаги Тошкент давлат ўзбек тили ва адабиёти университети Ўзбек филологияси факултети II босқич талабаси Мирали Ғиёсов интилувчан ва ғайратли талабалардан.
У бир йилдан буён "Навоий университети" овоз ёзиш студиясига раҳбарлик қилиб келмоқда. Шу кунгача 50 дан ортиқ ўзбек ва жаҳон адабиёти намуналарини у ўз тенгдошлари билан бирга овозлаштиришга муваффақ бўлди. Имконияти чекланган бўлишига қарамай, у барча монтаж жараёнларини ўзи амалга оширади, овоз танлашдаги маҳорати ҳам таҳсинга лойиқ.
Мирали ўз жамоасини доимо рағбатлантириб боради. Улар учун қандайдир имкониятлар яратишга интилади. Талабалар ҳам ундан инсонийлик ва ғамхўрликни ўрганмоқдалар.
Куни кеча Мирали бошчилигидаги талабалар студияси аъзолари Ўзбекистон кўзи ожизлар жамиятига ўз аудиокитобларини туҳфа этишди. Жамият мутахассиси Улуғбек Маматхонов талабаларга хайрли ва беминнат (бепул) ишга қўл урганликлари учун миннатдорчилик билдирди. Бу аудиокитоблар бутун республикамиздаги имконияти чекланган инсонларга етказилишини қайд этди.
Биз ўтаётган умримиздан гоҳ нолиб, гоҳ ўкиниб қоларканмиз, Мирали сингари ёш ва шу билан бирга имконияти чекланган бўлишига қарамай чегарасиз имкониятларни ўзи учун кашф этаётган инсонларга қараб яшашдан мақсад нима эканлигини англаймиз. Раҳмат сенга, Мирали!
Manbaa:Edu.uz