Tadbirkor va yoshlar uchrashuvi bo'lib o'tdi

Yurtimizda yoshlarning tadbirkorlik faoliyatini rivojlantirish uchun keng imkoniyatlar yaratilgan. Har qanday yangi biznes asosida ko‘plab g‘oya va yo‘nalishlar yotadi. Muvaffaqiyatli tadbirkorlar bilan muloqot esa yoshlarning bo‘lg‘usi faoliyatlarida mustahkam tirgak bo‘ladi.

Shu bois bugun, Toshkent kimyo-texnologiya instituti Yangiyer filialida “Faol tadbirkor” ko’krak nishoni sohibi, “Peng Sheng charm” MCHJ va “Sirdarya Ceramic Production” MCHJ bosh direktori o'rinbosari G'afur Axmedov hamda “Bekzodsher qurilish servis” MCHJ direktori Sherzod Vafoevlar bilan filial talabalari o‘rtasida uchrashuv bo‘lib o‘tdi.

Yoshlar bilan muloqotda tadbirkorlar muvaffaqiyatlar kaliti eng avvalo bilim ekanligini, bu yo‘lda talabalikning har bir lahzasidan unumli foydalanish zarurligini ta’kidlashdi. Shuningdek, mamlakatimizda kichik biznes va xususiy tadbirkorlikni rivojlantirish va tadbirkorlarni qo‘llab-quvvatlash borasida olib borilayotgan ishlar, berilayotgan imkoniyatlar haqida o‘z fikrlarini bayon qilishdi.

Tadbirkorlik faoliyatidan amaliy misol, zarur tavsiya, talabalarni qiziqtirgan savollarga berilgan aniq javoblar tadbirni ko‘tarinki ruhda o‘tishini ta’minladi. Talabalar tomonidan kichik biznesni yo‘lga qo‘yish, rivojlantirish bo‘yicha berilgan savollarga javoblar berildi.

Tadbir yakunida tadbirkor G'afur Axmedov o'z qalamiga mansub "Yaratganiga, yetkazganiga shukur" nomli kitobini filial kutubxonasiga sovg'a qildi.

Aytish joizki, bugungi uchrashuv yoshlarga o‘zgacha motivatsiya bag‘ishladi.