Goşgular

ÝATLADYŇMY

Kalbyň gussa agladan-da,
Birje sapar ýatladyňmy.
Her dem-ä däl aýda ýylda,
Birje sapar ýatladyňmy?

Ykbal ýoly öwrüm-öwrüm,
Söýgä bagyşlanan ömrüm.
Gussa batanynda göwnüň.
Birje sapar ýatladyňmy?

Bu ýollaryň synagy kän,
Çyn söýgiden ýanany kän.
Dert çekeňde pynhan-pynhan,
Birje sapar ýatladyňmy?

Biz bagta ýeteris haçan?
Hasratdan o:t alýar içim.
Belki unutmaklyk üçin.
Birje sapar ýatladyňmy?

Söhbet Orazmuhammedow