birinchi va soʻnggi raqs

AVTOR [ @YUJIN_ ]
— KANAL [ —Yujin's Wonderland | https://t.me/+hMKB3-D

Kecha yomg‘ir yog‘di. Bu shahar uchun odatiy narsa edi, lekin Jihyeening yuragida bugun hamma narsa boshqacha tuyulardi. U eski do‘kondagi deraza oldida o‘tirib, qo‘llarini issiq qahva kubogiga bosdi. U yerdan shahar maydoni ko‘rinardi, aynan o‘sha joyda u uni birinchi marta ko‘rgan edi…

Jungkook.

Ularning uchrashuvi tasodifiy edi. Jihyee odatda tungi shaharni tomosha qilish uchun shu maydonga chiqardi. O‘sha kuni esa kimdir karnay orqali sekin musiqani yoqqan, shinam chiroqlar maydonni yoritgan edi. Jihyee bir chetda turib, bu manzaradan zavqlanayotganida birdan kimdir yoniga keldi.

– Siz ham raqs tushishni yoqtirasizmi? – deya jilmaydi yigit.

Jihyee biroz o‘ylanib qoldi.

– Men raqs tushishni bilmayman… – dedi u.

– Unda men sizni o‘rgataman, – dedi Jungkook, qo‘lini unga cho‘zarkan.

Jihyee ikkilandi, lekin yuragidagi qandaydir hissiyot uni oldinga yetakladi. O‘sha kuni ularning ilk raqsi edi – noqulay, g‘alati, lekin juda ham iliq va unutilmas.

Ular shu tariqa tanishib ketishdi. Keyin har hafta shu yerda uchrashib, soatlab suhbatlashishdi, raqs tushishdi, kulishdi… Ammo hayot har doim ham ertak emas.

Oradan uch oy o‘tib, Jungkook jiddiy xastalikka chalingani ma’lum bo‘ldi. U bir necha oylik hayoti qolganini bilgach, Jihyeedan uzoqlashishga qaror qildi. Lekin Jihyee buni bilib, undan ketmadi.

– Sen hali ham shu yerga kelasanki? – so‘radi Jihyee bir kuni, uning qo‘lidan ushlab.

Jungkook chuqur nafas oldi.

– Bu yer men uchun juda muhim… Sen bilan bog‘liq.

– Unda bu maydon biznikiga aylansin. O‘lim emas, sevgimiz bilan eslansin… – dedi Jihyee.

Shunday qilib, oxirgi haftalarini ular shunday o‘tkazishdi. Birga raqs tushib, birga kulib, har bir kunni xotira sifatida qadriga yetib yashashdi.

Jungkook ketgan kuni ham yomg‘ir yog‘di.

Hozir, Jihyee yana shu joyda o‘tiribdi. Ammo bu safar u yolg‘iz. Uning yuragida og‘riq bor, lekin u xotiralardan quvvat oladi.

Tashqarida kimdir musiqani yoqadi. U esa qahvasini tugatib, maydon o‘rtasiga boradi.

Va yana birinchi marta bo‘lgandek, yolg‘iz bo‘lsa ham, raqs tushadi.

AVTOR [ @YUJIN_ ]