Баҳодир Мажидов: “Марказий Осиёда ягона бўлган бриллиант ва бошқа қимматбаҳо тошлар савдо маркази очмоқчиман!..”
Хабарингиз бор, Учтепа тумани ҳокимлиги туманда туғилиб ўсган, бугунги кунда юртимиздаги ислоҳотлар ва ўзгаришларга дахлдорлик ҳисси билан яшаб келаётган учтепалик ёшлар билан яқиндан мулоқот олиб бориш мақсадида, “Ёнимиздаги истеъдодлар” лойиҳасини амалга оширмоқда.
Лойиҳамизнинг навбатдаги қаҳрамони бриллиант тошлар бўйича халқаро эксперт Баҳодир Мажидов бўлди.
М.: Cизнинг геология ва кончилик соҳасига қизиқишингиз ва ушбу мутахассисликни танлашингизга нима сабаб бўлган?
Б.М.: Болалигимдан геология соҳасига қизиқаман. Шу боисдан 2011 - 2015 йилларда Тошкент давлат техника университетининг Геология ва кончилик иши факультетида ўқидим.
2019 йил “GEMOLOGY INSTITUTE OF AMERICA” институтининг “DIAMOND ESSENTIAL” йўналишини муваффақиятли тамомлаб сертификат олдим.
2016 йилдан буён бриллиант ва бошқа қимматбаҳо тошлар, қимматбаҳо металлар ва улардан ясалган заргарлик буюмлари экспертизасида фаолият кўрсатиб келяпман.
М.: Йўналишингизнинг бугунги ривожланаётган Ўзбекистон учун қай даражада муҳим деб ҳисоблайсиз?
Б.М.: Геология ва кончилик иши йирик соҳалардан бири. Лекин Ўзбекистонда ушбу йўналишдаги мутахассисларга талаб юқори. Чунки бу соҳа мамлакатимиз иқтисодиётига катта даромад келтириши билан ҳам аҳамиятлидир. Ҳозирда бриллиант тошлар бўйича юртимизда ягона бўлган халқаро даражадаги экспертман. Ислоҳотлар олиб борилаётган бугунги Ўзбекистон учун соҳани ҳар томонлама ривожлантириш зарур деб ўйлайман.
М.: Учтепа туманидаги мавжуд муаммоларни нималарда кўрасиз?
Б.М.: Очиғи айтганда Учтепа тумани пойтахтимиздаги ривожланиш нуқтайи назаридан энг паст кўрсатгичга эга туманлардан бири. Сўнгги вақтларда туманимиздаги ўзгаришларни сезяман. Янги қурилишлар, аҳолига ижтимоий кўмак кўрсатиш ишлари анча жонланди. Бундан хурсандман албатта. Лекин туманимизда ҳал қилиниши лозим бўлган ишлар кўп. Мисол учун, туманимиздаги аксарият йўллар таъмирталаб, айниқса хизмат кўрсатиш сифатини яхшилаш керак.
Умуман, Учтепа туманини бошқа туманларга қараганда энг илғор ҳудуд бўлишини хоҳлайман.
М.: Келгусидаги мақсадларингиз қандай?
Б.М.: Мақсадларим кўп. Келажакда Ўзбекистонда Марказий Осиёда ягона бўлган бриллиант ва бошқа қимматбаҳо тошлар савдо марказини ташкил этиш ва шу билан бирга халқаро экспертиза марказини ташкил этмоқчиман.
Учтепа тумани ҳокимлиги Матбуот хизмати