#MadeInUzbekistan

“Ўзчармсаноат” уюшмаси нафақат пойабзал, кийим-кечак ва чарм-атторлик буюмларини ишлаб чиқарувчи корхоналарни ўз таркибида бирлаштиради. Балки тайёр чармдан спорт анжомлари ва буюмларини ишлаб чиқарувчи корхоналар ҳам уюшманинг тенг ҳуқуқли аъзоси саналади. #MadeInUzbekistan рукни орқали сизларни футбол тўплари ишлаб чиқарувчи - "Forward-TH Sports" компанияси маҳсулотлари билан яқиндан таништирамиз.

Қўшма корхона 2018 йилда махаллий "Уз Тонг Хонг Cо" ва Покистоннинг "Forward Sports Pvt." компаниялари ҳамкорлигида ташкил этилган. Корхона фаолиятининг асосий йўналиши бу халқаро стандартларга мос келадиган елимланган ва тикилган футбол тўпларини ишлаб чиқаришдир. Завод нафақат Ўзбекистонда, балки бутун МДҲ мамлакатлари орасида футбол тўпларини ишлаб чиқариш бўйича энг катта ва илғор корхона саналади.

Компания замонавий хориж ускуналар билан жиҳозланган. Корхона кунига 1000 та спорт буюмларини ишлаб чиқариш қувватига эга. "Forward-TH Sports" маҳсулотлари орасидан сиз мамлакатимиз футбол мусобақаларида фойдаланиладиган елимланган профессионал тўплар, ҳаваскор ва машғулотларда ишлатиладиган тўпларни топишингиз мумкин. Шуни таъкидлаш керак, Ўзбекистонда халқаро стандартларга жавоб берадиган чоксиз панеллик тўплар фақат ушбу компанияда ишлаб чиқарилади.

Фабриканинг маҳсулотларини чакана савдода Тошкент ва Самарқанд шаҳрларида жойлашган спорт дўконларидан топишишингиз мумкин. Тез кунларда республикамиз бўйлаб етказиб бериш билан шуғулланадиган онлайн-дўкон очиш режалаштирилган. Тўплар нархи 65 000 сўмдан 150 000 сўмгача. "Forward-TH Sports" ўз маҳсулотларини бутун Ўзбекистон бўйлаб сотиш бўйича ҳамкорликка тайёр.