“SIEMENS AG” КОМПАНИЯСИ БИЛАН ҲАМКОРЛИК БЎЙИЧА МУЗОКАРА

“Ўзэлтехсаноат” уюшмасида “Siemens AG”нинг Россиядаги вице-президенти Александр Либеров билан ҳамкорлик учрашуви бўлиб ўтди.

“Ўзэлтехсаноат” уюшмаси раиси М. Юнусов даставвал меҳмонларга Ўзбекистонда электротехника саноатини ривожлантириш борасида амалга оширилаётган ислоҳотлар, германиялик инвесторлар иштирокидаги қўшма корхоналар, юртимизда хорижий инвесторлар учун яратиб берилаётган шарт-шароитлар, қонунчиликдаги имтиёзлар ва ҳуқуқий кафолатлар ҳақида тўлиқ маълумот бериб ўтди.

Биламизки, жаҳонга машҳур “Siemens” компаниясининг ташкил топганига бу йил 174 йил тўлади. Катта тарихий тажрибага эга мазкур компаниянинг бугунги кунда 190 дан ортиқ мамлакатларда ўз ваколатхоналари мавжуд. Шу боисдан, компания йирик тармоққа эга бўлиб, бу ерда асосан электротехника, электроника, энергетика ускуналари, транспорт, тиббиёт ва ақлли шаҳар лойиҳалари ҳамда ёритиш технологиялари ишлаб чиқарилади. Компанияда меҳнат қилаётган ишчи-ходимлар сони 400 мингдан ортиқни ташкил этади. Эътирофлиси, Ўзбекистонда ҳам ушбу компаниянинг ваколатхонаси фаолият юритади.

“Siemens AG”нинг Россиядаги вице-президенти Александр Либеров самимий қабул учун миннатдорлик билдириб, электротехника саноати тармоғига янги инвестиция лойиҳаларини кўпроқ жалб этишдан манфаатдор эканликларини, замонавий ишлаб чиқариш объектларини ташкил этиш орқали икки мамлакат иқтисодиёти учун бирдек манфаатли келишувларга эришиш ниятлари борлигини маълум қилишди.

Хусусан, учрашувда томонлар рақамлаштириш ва автоматлаштиришнинг саноатдаги ўрни ва мазкур жараёнда маҳаллий корхоналар билан “пилот лойиҳа” ни амалга ошириш, қуёш панеллари учун ячейкалар, инвертерлар, электромобиллар учун зарядловчи ускуналарни, ўта юпқа мис фольгасини ишлаб чиқариш бўйича қатор таклифлар ўртага ташланди ва ўзаро фикр алмашилди.

Учрашув сўнггида томонлар ўртага ташланган таклифлар юзасидан ишчи гуруҳини тузиб, икки томонлама мулоқотларни давом эттиришга келишиб олдилар.