ЖИЗЗАХ ВА ФАРҒОНА ВИЛОЯТИ ЭЛЕКТРОТЕХНИКА КОРХОНАЛАРИ ЎРТАСИДА САНОАТ КООПЕРАЦИЯСИ БЎЙИЧА ЯНГИ КЕЛИШУВЛАРГА ЭРИШИЛДИ

Мамлакатимизда маҳаллий ишлаб чиқарувчиларни қўллаб-қувватлаш, импорт асосида кириб келаётган маҳсулотлар ва хом-ашёларни ўзимизда маҳаллийлаштириш, корхоналар ўртасида саноат кооперациясини ривожлантиришга катта эътибор қаратилмоқда. Хусусан, “Ўзэлтехсаноат” уюшмаси корхоналари ўртасидаги кооперация алоқаларининг ривожланиши натижасида Импортдан кириб келаётган аксарият бутловчи қисмлар маҳаллийлаштирилиб, кооперация асосида етказиб берилмоқда.

Хусусан, Жиззахнинг Зомин туманида фаолият юритаётган “Trust Electronics” МЧЖ корхонаси билан Фарғона вилоятидаги “Rosso Electronics” МЧЖ ўртасида имзоланган келишувга кўра, “Trust Electronics” эндиликда “Rosso Electronics” МЧЖ томонидан ишлаб чиқарилаётган телевизорларга уланиш кабель симлари етказиб бериш бўйича қиймати 350,0 млн сўмлик шартнома имзоланди. Шартномага асосан маҳсулот етказиб берилиши бошланмоқда.

Маълумот учун: “Trust Electronics” МЧЖ Жиззах вилояти Зомин туманида фаолият олиб бориб 2013 йилдан бошлаб маиший техниканинг барча турлари учун уланиш кабель-сим маҳсулотлари ишлаб чиқаришни йўлга қўйган. Корхона йилига 5,0 млн дона уланиш кабель-симлари ишлаб чиқариш қувватига эга. Республиканинг 15 дан ортиқ саноат корхоналарига маҳсулот етказиб бермоқда.

Авваллари “Rosso” бренди остида ишлаб чиқарилаётган телевизорнинг аксарият бутловчи қисмлари, ҳатто электр таъминотига уланувчи кабель-симлари ҳам Хитойдан импорт асосида кириб келган эди. Имзоланган келишувга кўра, корхона иқтисоди анча тежалиб, эндиликда арзон ва сифатли сим маҳсулотларини ўзимиздан харид қилади. Шартномага кўра 50 минг дона худди шундай кабель-симлар етказиб берилиши йўлга қўйилди.