Фарғона вилоятида электротехника саноатининг ўрни қандай?
Мамлакатнинг шундай ҳудудлари борки, аҳоли эҳтиёжлари учун электротехника саноатига талаб ортиб бораверади. Биргина Фарғона вилоятининг инвестициявий салоҳиятида ҳам электротехника саноатининг ўзига хос ўрни ва аҳамияти бор.
Фарғона вилояти ҳақида қисқача:
Фарғона вилояти 1938 йил 15 январда ташкил этилган. Республиканинг шарқида, Фарғона водийсининг жанубида жойлашган. Шимолдан Наманган, Андижон вилоятлари, жануб ва шарқдан Қирғизистон, ғарбдан Тожикистон Республикалари билан чегарадош.
Майдони: 6,8 минг км2. Аҳолиси 3 млн 752 минг кишидан иборат. Шундан эркаклар 50,3 %, аёллар эса 49,7 % ни ташкил этади.
Шаҳар жойларда яшовчи аҳоли жами аҳолининг 56,7 % га тўғри келади.
Фарғона вилояти таркибида 4 та шаҳар ва 15 та туманлар бор.
Маркази - Фарғона шаҳри.
Асосий саноат тармоқлари - ёқилғи (нефтни қайта ишлаш), енгил саноат (пахта тозалаш), озиқ-овқат саноати.
Қишлоқ хўжалигининг асосий тармоқлари – дончилик, пахтачилик, боғдорчилик, узумчилик, гўшт-сут чорвачилиги, паррандачилик, ипакчилик.
Фарғонанинг инвестициявий салоҳияти
Фарғона вилоятида ҳар ҳафтанинг чоршанба куни «Инвестиция лойиҳаларини амалга ошириш ва саноатни ривожлантириш куни» этиб белгиланган. Вазирлар Маҳкамасининг 2019 йил 22 июлдаги “Фарғона вилоятида инвестиция лойиҳаларини амалга оширишни жадаллаштириш ва саноатни ривожлантириш чора-тадбирлари тўғрисида”ги 617-сонли қарори қабул қилинган. Унга кўра, “Фарғона вилоятида 2019-2020 йилларда амалга ошириладиган инвестиция лойиҳаларининг манзилли рўйхати” тасдиқланган. Жумладан, ушбу дастурда электр узатгичлар ва кабеллар ишлаб чиқариш, маиший техника воситалари ва бошқа электротехника буюмлари ишлаб чиқариш йўналишида истиқболли лойиҳалар ўз аксини топган.
Вилоятда бугунги кунда электротехника саноатининг турли йўналишлари маҳсулотлар ишлаб чиқарилмоқда.
Энг эътиборлиси, охирги йилларда республикада “Ўзэлтехсаноат” уюшмаси таркибига кирувчи корхоналар соғлиқни сақлаш тизимида ишлатиладиган тиббий буюмларни ишлаб чиқариш бўйича ҳам янги лойиҳалар устида ишламоқда. Республикамизда ҳозирги вақтда рентген асбоб-ускуналари, тиббий консоллар, чақалоқлар учун инкубаторлар ва карантин даврида тиббий ҳимоя воситалари ишлаб чиқариш ишларига ўз ҳиссасини қўшди.
Фарғона вилоятида ишга туширилган электротехника маҳсулотлари
Марказий Осиёда ягона ҳисобланган «Listem-Fergana» ўзбек-корея қўшма корхонаси томонидан бугунги кунда рентген асбоб-ускуналари ишлаб чиқарилмоқда. Корхона лойиҳасининг умумий қиймати 5 миллион доллар бўлиб, йилига икки турдаги 300 дона рентен аппарати ишлаб чиқаришга мўлжалланган. Биринчи босқич доирасида 35 киши иш билан таъминланган.
Маиший техника йўналишида Қўқон шаҳрида фаолият юритаётган "ROSSO ELEKTRONIC TECHNOLOGIES" МЧЖтомонидан ишлаб чиқарилаётган “ROSSO” бренди остида телевизорлар харидорбоп бўлиб, ички бозор имкониятларини қоплаш баробарида қўшни мамлакатларга ҳам экспорт қилинмоқда.
Данғара шаҳрида "DANGARA MEGA CATTLE" МЧЖ корхонаси электор чойнаклар ишлаб чиқаришни йўлга қўйган. Йиллик қуввати 30 минг дона бўлиб, 50 нафар ишчи ўринлари яратилган.
Шунингдек, кабель-сим йўналишида “Universal Uz Cable” хусусий корхонаси, “Real kabel invest” МЧЖ, “Yaproq plast” МЧЖ томонидан вилоятнинг бир қатор туманларида турли ҳажм ва кўринишдаги замонавий кабель-сим маҳсулотлари ишлаб чиқарилмоқда.
2020 йилда ҳам бир қатор янги лойиҳалар ва Инвестиция дастурига киритилган истиқболли лойиҳалар устида иш олиб борилмоқда.
Намоз Толипов, "Ўзэлтехсаноат" уюшмаси Ахборот хизмати раҳбари