МАИШИЙ ТЕХНИКА МАҲСУЛОТЛАРИ ЯМАНГА ЭКСПОРТ ҚИЛИНМОҚДА

Artel маҳсулотларини Яман Республикасига экспорт қилишни бошлади. Маҳсулотнинг биринчи партияси Яманга юборилди.

Artel экспорт географиясини кенгайтиришни давом эттирмоқда. Компаниянинг янги савдо ҳамкори Яман Республикаси. Томонлар йирик маиший техника ҳамда Artel мобил телефонларининг чет эл давлатига экспортини йўлга қўйиш бўйича келишувни имзоладилар. Ямандаги буюртмачи компания Polytron Yemen Company for Trading.

Бугунги кунда Artel маҳсулотлари МДҲ давлатлари, Грузия ва Афғонистонга экспорт қилинади. Яман Республикаси билан янги ҳамкорлик эса сифатли ва ҳамёнбоп Artel маиший техникасига бўлган талаб чет элларда йилдан йилга ошиб бораётганини яққол кўрсатиб турибди.

Яман Республикасига кондиционерлар, дудбуронлар, ошхона плиталари, микротўлқинли печлар ва мини-печлар, чангюткичлар, кир ювиш машиналари, телевизорлар, совиткичлар ва мобил телефонлар каби маиший техника юборилди. Экспорт қилинган маҳсулотнинг умумий миқдори 130 минг АҚШ долларидан ошиқ. Умумий экспорт миқдори эса 5 миллион АҚШ долларини ташкил этиши режалаштирилган.

Бугунги кунда Artel маҳсулотлари маҳаллий бозорларда катта талабга эга. Шу билан бирга Artel чет эл бозорларида ҳам ўз позицияларини сезиларли даражада яхшиламоқда. Жумладан, 2020 йилда экспорт миқдори 2019 йилга қараганда 32 фоизга ошди. Бундан ташқари Қозоғистонда ошхона плиталари бозорида Artel улуши 65 фоизга етди, экспорт миқдори эса рекордли 80 миллион АҚШ долларини ташкил этди. Буларнинг барчасини инобатга олиб, янги ҳамкорлик самарали бўлишига шубҳа қилмаса ҳам бўлади. Алоҳида айтиш лозимки, 2021 йилда Artel экспорт географиясини сезиларли даражада кенгайтиришни режалаштирган.