НАВОИЙДА ЛИФТ ИШЛАБ ЧИҚАРИЛМОҚДА корхона муаммолари жойига чиқиб ўрганилди

“Ўзэлтехсаноат” уюшмаси раиси М. Юнусов бошчилигидаги Ишчи гуруҳи республикадаги саноат корхоналари фаолиятини жойига чиққан ҳолда ўрганмоқда. Ишчи гуруҳининг Навоий вилояти эркин иқтисодий зонасидаги ташрифи чоғида Ўзбекистонда жаҳон технологиялари асосида сифатли ва арзон лифтлар ишлаб чиқарувчи “Golden lift” қўшма корхонаси фаолияти билан яқиндан танишдилар.

Умумий қиймати 2 млн.доллар бўлган “Golden lift” компанияси Хитой билан ҳамкорликдаги қўшма корхона ҳисобланади. Компания ҳар йили Республика бўйлаб қурилаётган кўплаб меҳмонхоналар, давлат идоралари, касалхоналар, хусусий муассасаларни сифатли лифтлар билан таъминлаб келмоқда. Унинг йиллик қуввати 500 дона йўловчи ва 100 дона юк ташиш лифтларидан иборат. Корхонада бугун 40 га яқин ишчи-ходимлар меҳнат қилади.

Корхона ҳамкорлар учун йўловчи лифтлари, касалхона лифтлари, юк ташиш лифтлари, гараж лифтлар, экскалаторлар, пўлат эшикларнинг кенг турдаги ассортиментларини ишлаб чиқаради. Ҳозирда компания нафақат Ўзбекистон, балки Россия ҳамда МДҲ давлатларида ҳам кўплаб қурилиш соҳасининг етакчилари билан ҳамкорликда фаолият олиб бормоқда.

Корхонанинг маҳаллийлаштириш даражаси 60 дан ортиқни ташкил этади.

Лифт ускуналари ҳар томонлама мустаҳкам ва чидамли бўлиб, дизайни билан бир-биридан ажралиб туради. Компания мутахассислари аввал бинонинг ўлчами, таъмири, қурилиш хусусиятларини ҳисобга олган ҳолда муносиб дизайнни яратишади. Лифтларни етказиб бериш ҳамда объектларга ўрнатиш ҳам компания томонидан амалга оширилади.

Ишчи гуруҳи корхонадаги шароитлар билан танишиш баробарида мавжуд муаммоларни ўрганди. Корхона раҳбари Жўрабой Жияновнинг сўзларига кўра, ишлаб чиқарилаётган маҳсулотларни сотиш ва реализация қилиш масалаларида муаммолар бор. Янги бозорларни топиш, буюртмаларни шакллантиришда тадбиркорга амалий кўмак керак. Бундан ташқари, маҳсулотларни хорижга экспорт қилиш, экспорт шартномаларини имзолаш, халқаро кўргазмаларда қатнашиш билан боғлиқ масалаларда ҳам Уюшма томонидан амалий ёрдам кўрсатилиши тушунтирилди.