ХИТОЙЛИК КОМПАНИЯ ЮРТИМИЗДА ОПТИК ТОЛАЛИ КАБЕЛЬ ИШЛАБ ЧИҚАРИШ ТАКЛИФИНИ БИЛДИРДИ
“Ўзэлтехсаноат” уюшмасида Хитойнинг “ELINC” компаниясининг Евроосиё департаменти Бош директори ўринбосари Huang Chao, компаниянинг Марказий Осиё бўйича директори Yao Aigang ва департамент иш бошқарувчиси Song Aili билан музокара бўлиб ўтди.
Учрашувда меҳмонларга “Ўзэлтехсаноат” уюшмаси корхоналарининг электротехника саноатини ривожлантириш борасидаги фаолиятлари, амалга оширилаётган янги инвестиция лойиҳалари, хитойлик инвесторлар иштирокидаги қўшма корхоналар томонидан ишлаб чиқарилаётган маҳсулотлар, истиқболдаги вазифалар хусусида маълумот берилди. Шунингдек, истиқболли лойиҳаларни татбиқ этишда хорижий инвесторлар учун юртимизда яратиб берилаётган шарт-шароитлар, қонунчиликдаги имтиёзлар ва қулайликлар ҳақида ҳам тушунтириш бериб ўтилди.
Хитойнинг “ELINC” компанияси бу тўлиқ давлат тасарруфида бўлиб, дунёни обод қилиш учун халқаро G-to-G илмий-техник ҳамкорликни ривожлантиради. Компания бугунги кунда мудофаа саноати учун зарур бўлган кузатув ва назорат тизимлари, киберхавфсизлик, ахборотлаштирилган муҳандислик, қурилиш инфратузилмаси, хавфсиз шаҳар лойиҳалари учун электротехника ускуналарини ишлаб чиқаради ва татбиқ этади. Компания юксак салоҳиятга эга бўлиб, дунёнинг 160 давлатида ўз офис ва объектларига эга. 130 мингдан ортиқ ишчи-ходимлар меҳнат қиладиган бундай компаниянинг дунёнинг TOP-500талик рўйхатига киритилган.
Учрашув чоғида хитойлик томонлар Ўзбекистонда чет эллик инвесторлар учун яратиб берилган шарт-шароитлар, ҳуқуқий кафолатлар ва республиканинг инвестициявий жозибадорлигини эътироф этган ҳолда бир нечта таклифларни илгари сурдилар. Жумладан, ҳозирги кунда интернет тармоғи учун зарур оптик толали кабелларга эҳтиёж ортганлигини инобатга олиб, Ўзбекистонда ҳам ушбу лойиҳани амалга ошириш, шунингдек янги авлод компьютер технологиялари – моноблок ишлаб чиқаришни йўлга қўйиш таклифини билдирди.
“Ўзэлтехсаноат” уюшмаси илгари сурилган таклифни қўллаб-қувватлаган ҳолда уни амалга ошириш механизмлари ва келгусидаги режалар бўйича тўхталиб ўтди.
Ўз навбатида Хитойнинг “ELINC” компанияси вакиллари Ўзбекистон томони билан электротехника саноатини ривожлантиришдан мамнунлигини таъкидлаб, бу борада соҳанинг турли тармоқларида ҳамкорлик қилишдан манфаатдор эканликларини билдирдилар.
"Ўзэлтехсаноат" уюшмаси Ахборот хизмати