ХИТОЙНИНГ “HOLLEY GROUP” КОМПАНИЯСИ ЎЗБЕКИСТОНДА ИНДУСТРИАЛ ТЕХНОПАРК ОЧИШ ТАКЛИФИНИ БИЛДИРДИ

Инвестициялар ва ташқи савдо вазирлиги ҳузуридаги Хорижий инвестицияларни жалб этиш агентлиги томонидан Хитойнинг “Holley Group” компанияси вакиллари билан онлайн видеомулоқот ташкил этилди. Унда “Ўзэлтехсаноат” уюшмаси масъул ходимлари ҳам иштирок этиб, Хитой компаниясининг электротехника, фармацевтика ва тўқимачилик саноатини ўзида мужассамлаштирган йирик технопарк қуриш ҳақидаги таклифларини муҳокама қилдилар.

Маълумки, Хитойнинг Ханчжоу шаҳрида жойлашган “Holley Group Co.LTD” корпорацияси 1970 йилда ташкил топган бўлиб, бугунги кунда Шимолий Америка, Жанубий-Шарқий Осиё, Европа ва Африка мамлакатларида ўз филиалига эга. Ўзбекистонда ҳам мазкур компания 2004 йилдан бошлаб кўп функцияли электрон ҳисоблагичларни ишлаб чиқармоқда.

Видеомулоқотда хитойлик томонлар Ўзбекистонга киритиладиган йирик сармоялар, шу жумладан электротехника маҳсулотлари, хусусан трансформаторлар, паст ва юқори кучланишли электр ўтказгичлар ва “ақлли” технологияларни ўзида жамлаган йирик лойиҳалар, шунингдек, фармацевтика ва тўқимачилик саноатига алоқадор бошқа лойиҳалар ҳақида ҳам тақдимот қилдилар.

Компания вакиллари билан амалга оширилиши таклиф қилинаётган лойиҳалар бўйича ўзаро фикр алмашилди. Бир нечта таклифлар ўртага ташланди. Музокара натижалари ва келгуси режалар бўйича ҳам келишиб олинди.