“Asia-Invest Bank” Ўзбекистондан маиший техника маҳсулотлари импорти учун кредитлар турини кенгайтирмоқда

“Ўзэлтехсаноат” уюшмасининг "Asia-Invest Bank" (АЖ) билан йўлга қўйган ҳамкорлик натижалари туфайли бугун Россия Федерациясига маиший техника ва электротехника жиҳозларини импорт қилувчи россиялик тадбиркорлар учун молиялашлаштириш манбаларига кенг йўл очилди. Жумладан, томонлар Ўзбекистоннинг “Артел”, “Royal”, “Shivaki” бренди остида ишлаб чиқарилаётган маиший техника маҳсулотларини сотувчи ва тарқатувчиларга кредит линиясини очиш бўйича келишувга эришдилар.

📌Келишувнинг амалий натижаси ўлароқ, сентябрь ойидан бошлаб банк томонидан “Артел” маҳсулотларининг Россиядаги дистрибютори “Артел-Рус” МЧЖга янги кредит линияси очилди. 💰Бу компанияга 2020 йил охиригача маиший техника маҳсулотларини етказиб беришни 10 миллион АҚШ долларигача ошириш имконини беради.

Таъкидлаш жоизки, бугунги кунда анъанавий турдаги маҳсулотлардан ташқари, "Ўзэлтехсаноат" уюшмаси корхоналари томонидан юқори қўшимча қийматга эга бўлган маҳсулотлар ҳам ташқи бозорларга экспорт қилинмоқда. Жумладан, кабель-сим маҳсулотлари, маиший техника ва электр кучланишли ускуналар шулар жумласига киради.

“Asia-Invest Bank”нинг молиялаштириш имкониятларидан фойдаланган ҳолда, «Ўзэлтехсаноат» уюшмаси корхоналарининг Россия бозорларига кириб бориши нафақат экспорт ҳажмининг ошишига, балки икки давлат ўртасидаги ўзаро товар айирбошлашнинг тез суръатлар билан ўсишига, халқаро ҳамкорлик алоқалари мустаҳкамланишига, пировардида Ўзбекистон иқтисодиётининг муҳим драйвери ҳисобланган электротехника саноатининг жадал ривожланишига катта замин яратади.