Artel компанияси Грузиядаги Gorgia билан ҳамкорлик қилишни бошлади

Artel компанияси чет эл бозорларини забт этишни фаол давом эттирмоқда. Корхонанинг янги ҳамкори – Грузиядаги Gorgia қурилиш гипермаркетлар тармоғи. Эндиликда юртимизда ишлаб чиқарилувчи сифатли маиший техникани Грузияда ҳам харид қилиш мумкин.

Gorgia компанияси Грузия бозорларида 1998 йилдан бери фаолият юритади. Бугунги кунда гипермаркетлар тармоғи Грузиянинг Тбилиси, Батуми, Кутаиси, Телави, Зугдиди ҳамда Марнеули шаҳарларида мавжуд.

Artel компанияси Gorgia билан жорий йилнинг май ойида ҳамкорлик қилишни бошлади. Компаниялар 10 млн АҚШ доллари миқдорида маиший техникани Грузияга етказиб бериш тўғрисида шартнома имзолашди. Шартнома бўйича июнь-июль ойларида 125 минг АҚШ доллари миқдорида телевизорлар, дудбуронлар, чангютгичлар, микротўлқинли печлар ва совутгичлар каби маиший техника Грузияга экспорт қилинди.

Чет эл бозорларида мустаҳкам жой эгаллаш халқаро алоқаларни кучайтириш ва иқтисодиётни жадал ривожлантиришнинг асосий омилларидан биридир. Экспорт ҳудудини кенгайтириш нафақат Artel компанияси, балки мамлакатимиз иқтисодиёти ривожланишига ҳам ўз ҳиссасини қўшади. Бугунда компания маҳсулотлари Ўзбекистондан ташқари 9 мамлакат аҳолисининг ҳурматига сазовор бўлган. Artel компанияси экспорт ҳудудини мунтазам кенгайтиришни режалаштирган. Яқин кунларда Artel келгуси йирик ҳамкори ҳақида эълон қилади.