Ла Масиядағы ең талантты орталық-қорғаушы – Пау Кубарси 🔥
Клуб соңғы уақыттарда академиядан шығатын орталық-қорғаушыларға деген философиясын өзгертті. Осыған дейін клуб қай жалпы позиция болмасын пас мықты болу қажет деген оймен келген. Соның нәтижесінде соңғы жылдарда Эрик Гарсия, Куэнка, Мика Мармоль сынды қорғаушылар шығып жүрді. Ал қазір клуб қорғанысқа мығым, физикасы мен дене бітімі жақсы жылдам қорғаушыларды, яғни ЗАМАНАУИ ҚОРҒАУШЫЛАРДЫ дайындайтын болған. Соның бірі бүгін кейіпкеріміз – Пау Кубарси!
Туған жері: Эстаньол (Испания)
Команда: Барса Атлетик / Хувениль А (U-19)
Келісім-шарт мерзімі: 30.06.2026
Ойыны ұқсас ойыншылар: Рубен Диаш, Милан Шкриньяр
• Қорғаныс, допты тартып алу, блок-шот
• Қарсылас прессингінде өте сабырлы
Мансабы:
Пау Кубарси 2018 жылы Жирона академиясынан Ла Масияға келіп қосылады. 2021/22 жылғы маусымда Кадет Б (U-15) сапында орталық-қорғаушы болғанына қарамастан 6 гол соғып, 3 ассист береді. Сонымен қатар Кадет А (U-16) сапындағы дебюттік ойынында гол соғып көзге түседі.
Сол маусымдағы сәтті ойынынан кейін 2022/23 маусымда Пау 15 жасында Кадет Б сапынан бірден Хувениль Б (U-18) серпіліс жасайды.
Ибан Куадрадо (Хувениль Б бапкері): "Мен Ла Масияда бұрын соңды Пау Кубарси секілді қорғаушы көрмедім. Пау – қорғаныстан қалай ләззат алуды білетін ойыншы, ол тума талант, ал қалғаны тәжірибемен келеді.".
Сонымен қатар Кубарси жастар арасында ЧЛ-да Хувениль А (U-19) сапында Виктория Пльзень жастарына қарсы дебют жасап, ең жас дебютанттар қатарынан табылады.
📊 Барселона сапында жастар арасындағы ЧЛ-да ең жас топ-3 дебютанттар:
1. Ламин Ямал: 15 жас, 1 ай, 25 күн
2. Илайш Мориба: 15 жас, 9 ай, 5 күн
3. Пау Кубарси: 15 жас, 9 ай, 10 күн
2023 жылдың 19-шы сәуірінде Кубарси алғаш рет Хавидің шақыртуымен 16 жасында негізгі құраммен жаттықты. Содан кейін де негізгі құрам жаттығуына жиі шақыртылып жүрді. Осындай керемет маусымнан кейін Кубарсидің есімі клубта талқылануы заңдылық еді. Ферран Мартинес деген тілші сол кездегі клубтың спорт-директоры Жорди Кройф пен Матеу Алемани болашағынан көп үміт күттіретін 8 ойыншының тізімін жасады деп ақпарат берген болатын. Ол тізімді Аларкон, Ямал, Гарридо, Касадо, Чади Риад, Эстанис, Пау Прим сынды ойыншылармен бірге Пау Кубарсидің де есімі аталды.
ЕУРО U-17 турнирі
Бұл турнир Кубарсидің бағын ашқан турнирлердің бірі болды. Каталондық клубтағы басқа әріптестері Ламин Ямал, Пау Прим, Марк Гуйу секілді талантты ойыншылармен бірге Пау Кубарсиде Испания құрамасының лидерлерінің бірі болды. Осы турнирде Пау жаңа қырларынан көрініп турнирдің ең үздік қорғаушыларының бірі болды. Нәтижесінде Кубарси Испания ұлттық-құрамасымен бірге турнирдің қола жүлдегері атанды.
ЕУРО U-17 турнирінде Пау Кубарсидің топтық кезеңдегі статистикасы:
• 17 рет допты қарсыластан тартып алған
• 6 рет әуедегі таласта жеңген (67%)
• 13 рет қорғаныстағы дуэлдерде жеңген (68%)
Жаңа маусым / Манчестер Сити тарапынан қызығушылық
Өткен маусымда Кубарсидің Еврода, жастар арасындағы ЧЛ-да жасаған прогресі көптеген топ клубтардың назарын аудартты. Ал клуб болса оның болашағын нақты шеше алмай жатты. Осы кезде Манчестер Сити Испандық жас талантқа қатты қызығушылық танытты. Тіпті кейбір академиямен байланысы бар тілшілер Кубарсидің шынымен де Қалалықтар сапына кетіп қалуы мүмкін екенін айтты. Алайда 8-ші шілде күні Пау Кубарси Барселонамен 3 жылдық кәсіби келісім-шартқа қол қояды🔥 Осылайша жас талант Каталондық клубта қалады. Ал клуб оған сыйлық ретінде негізгі командамен маусымаралық дайындық ойындарына дайындалуды ұсынады.
Алайда Кубарси, Прим секілді жас таланттар негізгі командамен АҚШ-тағы турға бармай, екінші команда, яғни Барса Атлетик сапына кетеді. Пау Рафа Маркестің баптауымен маусымаралық дайындық матчтарының біразын негізгі құрамда бастайды. Өзінің қатарласы Марк Бернальмен (2007) бірге Барса Атлетик сапындағы сенсациялардың бірі болады. Бірақ Барса Атлетик бапкері Маркес, Кубарсидің де Бернальдың да келесі маусымды Хувениль А (U-19) сапында өткізетінін жеткізді. Бірақ маусым ұзақ, Кубарсидің Файемен бірге Барса Атлетик қорғанысында ойнайтынына сенімдімін. Олай болмаған күннің өзінде жастар арасындағы ЧЛ-да қызықты ойындарын көреміз.
Ойын стилі:
Пау Кубарси – академиядағы толыққанды жетілген, нағыз қазіргі заман футболының қорғаушысы.
• Пау дене бітімі жетілген, физикасы мығым, және ептілігі тағы бар. Төрт қорғаушымен ойында оң жақпен қатар сол жақ орталық-қорғаушының рөлінде ойнайды.
• Доппен өте ұқыпты, алыс-қысқа пастары ғаламат.
•Қарсылас прессингінде өте сабырлы, сасып қалып доптан айырылу дегенді білмейді. Өзінің ойынды оқуымен, шешімді уақытылы қабылдауымен танымал.
• Өз дене бітімін, физикасын қалай пайдалану қажет екенін жақсы біледі, қарсылас шабуылшыларына қарсы ойнағанда өз физикасын артықшылық ретінде пайдаланады.
• Қорғаныста агрессивті (дұрыс мағынада), әдетте таза ойнайды, сары қағаз сирек алады. Жеке және командалық ойында өте керемет.
• Әуедегі допқа таласта ешкімге жеңіле бермейді. Оң аяғымен қатар сол аяғымен де өте жақсы ойнайды.
Пау Кубарсидің алаңдағы жүріп өткен жолдары, яғни "тепловой картасы" (Wyscout)
Пау Кубарсидің бос қақпаны голдан сақтап қалған сәті.
Кубарси қарсылас қысымында салқынқандылық сақтап, қапталға керемет пас асырды.
Кубарси қарсылас ойынын оқып, қауіпті шабуылдан аман алып қалды.
Пау Кубарси – академиядағы сөзсіз жетілген ең талантты қорғаушы 💎 Егер жарақаттан аман болса алдағы 1-2 жылда негізгі командаға келері сөзсіз. Клубтың қорғаушыларға деген философиясын өзгерткені оң нәтижесін берді, соның арқасында клубта Микаил Файе (2004 🇸🇳), Пау Кубарси (2007🇪🇸), Андреа Натали (2008, 🇮🇹), Маду Мурсия (2008, 🇪🇸), Баба Курума (2009, 🇪🇸 Илайш Морибаның бауыры) сынды жас талантты заманауи қорғаушылар өсіп келуде. Олар туралы міндетті түрде арнайы мақалалар шығады.