Гиле Фернандес – Ла Масиядағы Ламин Ямалмен бірге ең үздік талант 💎
Ла Масия әр жыл сайын таланттар шығарудан жалығар емес. 2019 жылдары бұл үрдісті Фати бастап берген болатын содан бері Гави, Бальде, Ямал, Лопес сынды үлкен таланттар шыққан болатын. Енді келесі кім? Бүгінгі кейіпкеріміз 15 жасар Гиле Фернандес болмақ.
Алаңдағы орны: Жартылай-қорғаушы (ЦП), шабуылдаушы жартылай-қорғаушы (ЦАП)
Келісім-шарт мерзімі: 2024ж, 30 маусым
Ойыны ұқсас ойыншылар: Педри & Беллингем
• Комбинациялық ойындағы шеберлігі
Гиле 2008 жылы 18 маусымда туған. 2018 жылы 10 жасында Эспаньол академиясынан Ла Масияға көшіп келген. Сол кезден бастап ол Ла Масияның ең үздік жартылай-қорғаушысы саналды. 2022/23 жылғы маусымда Гиле Инфантиль А (U-14) сапында маусымды 15 гол, 5 ассистпен аяқтаған, және Кадет Б (U-15) сапында да дебют жасап, гол соғып үлгерген. Гиленің жақсы ойыны оған Инфантиль А сапынан бірден Кадет А (U-16) сапына серпіліс жасауына көмектесті.
Гилье Фернадес 2022/23
14 жасар Гиле Фернандестің 2022/23 маусымда Кадет А (U-16) сапындағы статистика:
🥈 Лига мен командадағы 2-ші үздік бомбардир
🥉Командасының 3-ші үздік ассистенті
🏆 Marveld және Кевин де Брюйне яғни KDB Cup турнирлерінің үздік ойыншысы
🔎 Жорже Мендештің агенттігімен келісім-шарт
Дәл қазіргі сәтте Гиле өзінен үлкендермен ойнайды. Инфантиль А сапынан Кадет А сапына жасаған серпілісі оған ешқандай қиындық тудырмады. Фернандес маусымды жоғарыда атап өткендей 16 голмен аяқтады. Гиле қатысқан КДБ турнирі мен Marveld турниріндегі жас таланттың ойыны, көптеген жанкүйерлер мен клубтардың назарын аудартты. Marveld турнирінде Гиле турнирдің MVP атанды. Бұл атақты ең соңғы рет клубтан Фальке (2005) мен Жорди Альба (2004) алған болатын. Араға бірнеше күн салып Гиле тағы да Кевин де Брюйне турнирінде жарқырады. Ол жерде де турнирдің MVP атанды
Гильермо Фернандес – заманауи жартылай-қорғаушы!
Гиле жоғары көтеріліп те ойнай алады және төмен түсіп ойынның темпі мен ойынның жүруіне жауап беріп те ойнай алады. Гиле Ла Масияда сирек кездесетін жартылай-қорғаушының типіне жатады, яғни заманауи жартылай-қорғаушы. Оның физикасы мығым, дене бітімі туылғанынан ірі. Сол дене бітімінің арқасында ол өз жасынан үлкен ойыншыларға қарсы ойнап жүрді. Ол ойында өзінің әрекетімен команданы шабуылға бастай алады, және 3-4 ойыншымен дуэлге түсу Гилеге мәселе емес. Ол өзінің ойынымен командаға үлкен ықпал тигізеді, өзінің ойынға ықпалы арқылы басқа ойыншылардың да деңгейін көтереді. Бұл қырлары оны Педри, КДБ секілді ойыншылармен ұқсастырады. Сонымен қатар Гиле допты өз алаңынан немесе он шақты метр жерден емін-еркін алып келе алады, Френкидің стилінде қарсыластардан өтіп кетуге қабілетті. Оның тағы бір жақсы тұсы ол жартылай-қорғаушы бола тұра, шабуылды аяқтай алады, оны статистикасынан байқасаңыздар болады. Гиле айып алаңының сыртынан да жақсы соққылар жасайды.
Жаңа маусым 2023/24
Гиле былтырғы маусымда Кадет А сапындағы сәтті маусымынан кейін ол жақта қалмайтыны түсінікті еді. Хувениль Ю (U-18) немесе Хувениль А (U-19) сапына ауысатыны анық болатын. Жақында бұл екі категория маусымға дайындықты бастады. Гиле Оскар Лопестің Хувениль А командасына бірден серпіліс жасады. Бұндай серпілісті Ла Масия тарихында бір ғана ойыншы жасаған. Ол Ламин Ямал болатын. Енді міне Гиледе осы ізбен жүруде. Кеше ғана Хувениль А Индонезия жастарын 3-0 есебімен жеңді, Гильермо дебюттік ойынында, дебюттік голын соқты🔥
Гильермо – сөзсіз Ламинмен бірге Ла Масиядағы үздік талант. Екеуінің жолы өте ұқсас. Жарақаттан аман болса, алдағы 1-2 жылда негізгі құрамда ойнайтын жартылай-қорғаушы келе жатқаны анық ⭐️