«Әйелдің өз үйіндегі намазы «хужрада» оқыған намазынан, ал бөлмесінде оқыған намазы үйіндегі намазынан абзал».

Хазіретті Ибн Масғудтан, Аллаһ оған разы болсын, риуаят еткен хадисте: Аллаһ Елшісі ﷺ айтты: «Әйелдің өз үйіндегі намазы «хужрада» оқыған намазынан, ал бөлмесінде оқыған намазы үйіндегі намазынан абзал». Хадисті Әбу Дәуіт риуаят еткен.

Мулла Әли әл-Қари әл-Ханафи әл-Матуриди «Мирқату әл-Мәфәтих шарх Мишкат әл-Масабих» (хадис нөмір: 1063) кітабында хадистің түсіндірмесінде айтты:

(Аллаһ Елшісі ﷺ айтты: «Әйелдің өз үйіндегі намазы) яғни, оның толық жабықтығы үшін үйінің ішінде оқыған намазы («хужрада» оқыған намазынан) яғни ауласы (үйдің ортасындағы ашық жер). Ибн әл-Малик былай деді: «Хужра деп үйдің есіктері бағытталған ауланы айтады. Ал сол жерде оқылған намаз – үйде оқылған намаздан төмен дәрежеде болады», (ал бөлмесінде оқыған намазы) бұл үйдің ішінде орналасқан шағын бөлме. Құнды заттар сақталады (яғни, бөтен адамның көзі түспейтін үйдегі ең түпкі бөлме), (үйіндегі намазынан абзал»). Себебі әйелге қатысты үкімдер жабықтыққа негізделген. Сондықтан да: «Әйелдің ең жасырын болатын жері – қабір», - дейді». (Хадисті Әбу Дәуіт риуаят еткен). Мирак айтты: «Әбу Дәут және әл-Мунзири хадис туралы үндемеді. Ибн Хаджар айтты: «Хадис тізбегі Муслимнің шартына сай»».