Аллаһ Елшісі ﷺ ауыз ашқанда былай дейтін: «Уа, Аллаһ! Сен үшін ораза ұстадым және Сенің ризық-несібеңмен ауыз аштым».

Муғаз ибн Зуһра (Аллаһ оны рақымына алсын) жеткізеді: Аллаһ Елшісі ﷺ ауыз ашқанда былай дейтін: «Уа, Аллаһ! Сен үшін ораза ұстадым және Сенің ризық-несібеңмен ауыз аштым». Хадисті Әбу Дәуд «мурсал» түрде келтірген.

Қазақша транскрипция: «Аллаһумма ләкә сумту уә әлә ризқикә афтарту».

Мулла Әли әл-Қари әл-Ханафи әл-Матуриди «Мирқату әл-Мәфәтих шарх Мишкат әл-Масабих» кітабында (1994-ші) хадистің түсіндірмесінде айтты:

«(Муғаз ибн Зуһра жеткізеді) табиғин. Одан Хусайн ибн Абдуррахман әс-Сулами әл-Куфи риуаят еткен. Әт-Тайби оны атап өткен: (Аллаһ Елшісі ﷺ ауыз ашқанда былай дейтін) яғни дұға ететін деген мағынада. Ибн әл-Мәлик: «Яғни ауыз ашқаннан кейін оқитын»: («Уа, Аллаһ! Сен үшін ораза ұстадым және Сенің ризық-несібеңмен ауыз аштым»).

(Хадисті Әбу Дәуд «мурсал» түрде келтірген). «Әт-Тақриб» кітабында: «Муғаз ибн Зуһра – үшінші буыннан, хадистері қабыл етілетін адам. Бір хадисті мурсал түрде жеткізген. Оны сахаба деп атаған кісі қателескен» делінген.

Мирк: «Әбу Дәудтың сөзінде: “Муғаз ибн Зуһрадан: оған жеткеніне қарағанда, Пайғамбар ﷺ оны оқыған” деп келген. Сондықтан “Пайғамбар ﷺ ауыз ашқанда айтатын еді” деп нақты айту дұрыс емес» деген. Муғаз ибн Зуһраны ибн Хиббан «сиқат» (сенімділер) қатарына енгізген. Оның осы бір хадисін тек Әбу Дәуд қана риуаят еткен, бұдан басқа хадисі жоқ.

Хафиз Ибн Хаджар: «Мурсал болуына қарамастан, мұндай мәселеде ол дәлел бола алады. Сонымен қатар, әд-Дарақутни мен Табарани оны тізбегі жалғасқан иснадпен де риуаят еткен, бірақ ол әлсіз. Соған қарамастан, мұндай бабта дәлел ретінде алынады» деген.

Ибн Мәджа: «Ораза ұстаушының ауыз ашқан сәтінде кері қайтарылмайтын дұғасы бар» деген хадисті риуаят еткен.

Сондай-ақ, Пайғамбарымыз ﷺ: «Ей, Кешірімі кең (Раббым)! Мені кешіре гөр!» деп айтқаны келген. Тағы бір риуаятта: «Маған жәрдемдескен Аллаһқа мадақ! Ол маған ораза ұстауға күш берді және ризық беріп, ауыз аштырды» дегені жеткен.

Ал ел ішінде кең тараған: «Уа, Аллаһ! Сен үшін ораза ұстадым, Саған иман келтірдім және Сенің ризық-несібеңмен ауыз аштым» деген мәтіндегі «Саған иман келтірдім» деген қосымша сөздің негізі жоқ, мағынасы дұрыс болғанымен, хадис ретінде дәлелденбеген. Сол сияқты «Саған тәуекел еттім және ертеңгі оразаға ниет еттім» деген қосымша да негізсіз. Ал ниетті тілмен айту – кейбір ғалымдар оны «жақсы бидғат» деп атаған».