Аллаһ Елшісі ﷺ айтты: «Әйел бес уақыт намазын оқыса, оразасын ұстаса, пәктігін сақтаса және күйеуіне бағынса...»

Хазіретті Әнәстан риуаят еткен хадисте: Аллаһ Елшісі ﷺ айтты: «Әйел бес уақыт намазын оқыса, оразасын ұстаса, пәктігін сақтаса және күйеуіне бағынса, жәннаттың қалаған есігінен кіреді». «Әл-Хилия» кітабында Әбу Нуайм риуаят еткен.

Мулла Әли әл-Қари әл-Ханафи әл-Матуриди «Мирқату әл-Мәфәтих шарх Мишкат әл-Масабих» (хадис нөмір: 3254) кітабында хадистің түсіндірмесінде айтты:

«(Аллаһ Елшісі ﷺ айтты: «Әйел бес уақыт намазын оқыса) яғни, тазалық уақытында парыз етілген бес уақыт намазды толық орындаса, (оразасын ұстаса) яғни, Рамазан айының оразасын және қазасын өтесе, (пәктігін сақтаса) яғни, арсыздық және түрлі азғын істерден аулақ ұстаса (және күйеуіне бағынса) яғни, шариғат бойынша мойынсұну міндет болған мәселелерде күйеуіне мойынсұнса, (жәннаттың қалаған есігінен кіреді») яғни, бұл – ол әйел үшін жәннатқа кіруге ешқандай кедергі болмайтынын және оның жәннатқа жетуі өте жеңіл әрі жылдам болатынын білдіреді».