September 12, 2019

Ўзбекистон Республикаси ИИВ Йўл ҳаракати хавфсизлиги бош бошқармаси ОГОҲЛАНТИРАДИ!

Ўзбекистон Республикаси Вазирлар Маҳкамасининг 2019 йил 2 августдаги 646-сон қарори талаблари асосида ойналарининг туси ўзгартирилган кўплаб транспорт воситалари кўчаларимизда кўзга ташланмоқда. Яратилган бундай қулайликдан транспорт воситалари ҳайдовчилари, шу жумладан республика ҳудудига ташриф буюраётган сайёҳлар мамнун бўлишмоқда.

Тўғри, авваллари транспорт воситаларининг орқа ва орқа ён ойналарининг тусини ўзгартириш анча қиммат эди, яъни 18 миллион 245 минг 700 сўмни ташкил этарди.
Фуқароларнинг таклиф ва истаклари инобатга олиниб, уларга қулайлик яратиш мақсадида орқа ойналар тусини чекланмаган миқдорда тўловсиз қорайтиришга рухсат берилди.
Орқа ён ойналарининг тусини ҳам чекловсиз ўзгартириш рухсатнома асосида 2 миллион 223 минг сўмга амалга оширилиши белгиланди.
Ҳаттоки, қарор билан олд ён ойналарнинг тусини ҳам ёруғлик ўтказувчанлиги 50 фоиздан кам бўлмаган даражада ўзгартиришга рухсат берилди. Олд ва орқа ён ойналарнинг тусини ўзгартириш(қорайтириш)га рухсатнома олиш учун тўловлар нархлари ҳам сезиларли даражада пасайтирилди ва 11 миллион 150 минг сўм қилиб белгиланди.
Шунингдек, ушбу қарор билан Давлат йўл ҳаракати хавфсизлиги хизмати (ДЙҲХХ) бўлинмаларида ойналарнинг тусуни ўзгартирганлик учун рухсатнома ва махсус галограммалар берилмоқда.
Шунга қарамай минг афсуслар бўлсинки, транспорт воситалари ойналарининг тусини ўзгартириш(қорайтириш)нинг тартибларини бузаётган, бу талабларни менсимаётган ёки унга амал қилмаётган ҳайдовчилар ҳам бор.
Масалан, фақатгина орқа ва орқа ён ойналарнинг чекловсиз қорайтириш белгиланган бўлсада, айрим ҳайдовчилар транспорт воситасларининг олд ён ойналари тусини ҳам чексиз даражада қорайтириб олишмоқда ва бу билан қарор талабларини қўпол равишда бузмоқдалар.
Энг ачинарлиси, айрим ҳайдовчилар амалдаги қонун ва қарор талабларини менсимасдан, ҳеч қандай рухсатномалар олмаган ҳолда транспорт воситалари ойналарининг тусини ўзгартириб(қорайтириб) олишмоқда.
Қоидалар беҳудага ишлаб чиқилмайди. Шундай экан, ҳар бир ҳаракат иштирокчиси яратилган шароитлардан тўғри фойдаланиши шарт. Акс ҳолда қоидабузарлик учун жазо муқаррардир.
Эслатиб ўтиш жоизки, Ўзбекистон Республикаси Маъмурий жавобгарлик тўғрисидаги Кодексининг 126-моддаси шундай дейилади:
“Техник регламентга мувофиқ бўлмаган кўзгусимон ва (ёки) туси ўзгартирилган (қорайтирилган) ойнали транспорт воситаларидан, худди шунингдек ҳайдовчининг ўрнидан теварак-атрофни кўришни чеклайдиган қўшимча нарсалар ўрнатилган ёки қопламалар суртилган транспорт воситаларидан фойдаланиш, бундан белгиланган тартибда ойналарни қорайтириш учун тегишли рухсатнома берилган транспорт воситалари мустасно, базавий ҳисоблаш миқдорининг йигирма беш баравари миқдорида жарима солишга сабаб бўлади.
Бу 5 миллион 68 минг 250 сўмни ташкил этади.

Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, базавий ҳисоблаш миқдорининг қирқ баравари миқдорида жарима солишга сабаб бўлади.
Бу 8 миллион 109 минг 200 сўмни ташкил этади.

Бундан ташқари, транспорт воситаси камчиликлари бартараф этилгунга қадар вақтинчалик жарима майдонига қўйилади.
Албатта, юқорида айтиб ўтилганлардан транспорт воситалари ойналарининг тусини қарор талабларига зид равишда ўзгартириб (қорайтириб) юрган ҳайдовчилар тўғри хулоса чиқаришади.
Энг муҳими транспорт воситалари ойналарининг тусини ўзгартириш(қорайтириш)ни ният қилган ҳар бир ҳайдовчидан, у хоҳ жисмоний, хоҳ юридик мақомга эга бўлишидан қатъий назар Ўзбекистон Республикаси Вазирлар Маҳкамаси қарори талаблари асосида иш юритиши лозим.
Ҳайдовчилардан транспорт воситалари ойналарининг тусини ўзгартириш(қорайтириш) ишларини қарор талаблари асосида, жорий этилган рухсатнома ва махсус галограммаларни ўз вақтида расмийлаштиргандан сўнг амалга оширишларини сўраб қоламиз.