Adobe запустят Creative Cloud Express — зпрощену матарґу на мальованя

Фірма Adobe добре розуміє, ож помежи потенціалныма хосновачами йих проґрамных продуктӯв є многым бӯлше аматерӯв, гикой професіоналӯв. А значит маєме дуже читавый рокаш люди, котрі хоснувут невеликый процент того матаржиня, котрый понукат Adobe, но мусят куповати цїлый проґрамный продукт.

Аплікація Creative Cloud Express понукат вам дуже зпрощені верзії редакторӯв образчиків тай відей, дає вам серсаму на роботу из слоями, ефектами, має битярську бібліотеку тіпӯв, но при тӯм має силно многым май простый інтерфейс, обы хосновачам было май легко найти трїбну ґомбу.

Майчасто людьом треба дашто домак простоє, легкоє. Люди, котрым треба наскоринько зрїхтовати контент, йим не натӯлко важно выпоцовати детайлы. — каже нам Скот Белксі, продуктовый менаджер Adobe. Основна цїль Creative Cloud Express у тӯм, обы хосновачі не мусїли тратити повно годин на курсы, обы ся навчити изкладовати образчикы у Photoshop, а обы могли нараз дӯстати жаданый резултат, мавучи не тяжкі нарокы. Треба просто шіковно учинити файный образчик, тай готово.

Вызират так, ож сеся матарґа є нацїлена якраз на дрӯбных менаджерӯв каналӯв у соціалных сїтьох, авадь ґаздовӯв невеликого бізнеса, котрым треба бы чинити промоції, но они не сут експертами у ґрафічных редакторах, не сут дізайнерами.

Стартовоє вӯчко аплікації дає вам выбрати даякый заголовленый шаблон: ци тото буде «флаєр», ци публикація у Facebook, ци, може, історія в Instagram, ци позадина на вашоє новоє відео на YouTube, ци тото буде испис їдїня у вашому ресторанови, тай такоє всякоє... Чим исьте си выбрали шаблон, та пак можете си наштімовати його окремі елементы пӯд свої цїлї. Там можете си накласти образчикы из уже заготовленої бібліотекы, можете редаґовати текст, придавати анімації. Из ушыткого исписа варта спомнити матарґу, котра буде автоматічно вырїзати позадину из вашого образчика, лишавучи лиш централні обєкты.

Алікація є сама выд себе задарьна, айбо далші елементы, гикой бібліотека готовых образчикӯв, Adobe Stock, буде доступна за $9.99 за місяць. Adobe Creative Express доступна онлайн уже типирь на платформах iOS, Android, авадь просто у вашӯм веб-бравзерови.

Жерело: The Verge

Читайте нас на Twitter тай Telegram