Анонсовали метасвіт тай NFT у S.T.A.L.K.E.R. 2

Чеканоє продовженя стане «первов AAA-бавков, частьов котрої будут годни володїти бавячі», ги заявила украйинська штудія.

Євгеній Григорович, ґенералный діректор GSC Game World, уповів, ож його штудія годна «понукати штось май грубоє ги імерзивный бавячськый досвід» — «бавячі будут годни присутствовати у самӯв бавцї», а розробникы S.T.A.L.K.E.R. 2: Heart of Chernobyl «дадут йим таку шансу, указавши перву AAA-бавку з унікалным метаелементом».

Удмічає ся, ож ид розробцї «метаелемента» GSC Game World закликала компанію DMarket — властника платформы про торг NFT тай технолоґій на заложеня «метасвітӯв». Предметы, заязані на NFT, будут ся выпускати у видї «дропӯв» на платформі DMarket, а реєштрація ся зачне уже у децемброви 2021. года. Поку знаєме, ож мож буде купити NFT на подаякі уднушньоигрові предметы тай «металюди» — неигровых персонажӯв (NPC), котрі будут упозіровати ги властникы удповідных NFT. Ипен «металюдинов» буде первый «дроп», котрый планувут продати на аукціонови у януарови 2022. года; на слїдувучый місяць пӯсля того, другов габов, розробникы роздадут даякі «суперсекретні ґенеза-наборы», а вшыткі другі «дропы» будут ся убявляти на офіціалных Twitter-профілови тай Discord-серверови.

NFT-предметы мож буде обміньовати на платформі DMarket уд момента, кой йих дӯстанете, до реліза S.T.A.L.K.E.R. 2: Heart of Chernobyl.

Представитилї GSC Game World позорувут, ож NFT нияк не будут уплывати на ґеймплей, а бавячі, котрі йих куплят, не дӯстанут ниякых переваг удну бавкы.

Ги писали сьме май давно, Valve заказала бавкы з NFT на свою̄в платформі онлайн-діштрібуції Steam — айбо розробникы S.T.A.L.K.E.R. 2: Heart of Chernobyl увірені, ож проблем из сим бовтом у бавкы не буде позад того, ож она не є заложена на блокчейнови, а «S.T.A.L.K.E.R.’s Metaverse» тай NFT-предметы будут реалізовані на сторонню̄в платформі.

GSC Game World не перва игрова штудія, котра провбує імплементовати NFT у свойому продуктови. Недавно мали сьме барз неґативну реакцію сообщества на Quartz — NFT-платформу уд Ubisoft, де торг буде ити ціфровыми предметами за кріптовалуту. Такой недавно 22Cans, штудія Пітера Моліньє (Populous, Fable, Godus) убявила запуск свойого бізніс-сімулатора Legacy, заложеного на NFT, тай розказала за кріптовалуту LegacyCoin, запуск котрої буде акомпанійовати реліз бавкы.

Жерело: The Verge

Читайте нас на Twitter тай Telegram