Apple годни скоро ся удказати уд гнїзда Lightning на хосен USB-C

У сьому увіреный аналітик Мін Чі Кво, чії податкы указувут на планы Apple у 2023. рокови забрати з iPhone свӯй пропрієтарный штандарт Lightning тай замінити го шыроко хоснованым у світї гнїздом USB Type-C. Мін Чі Кво пише, ож сяка зміна годна повысити скороту передачи податкӯв тай зарядкы.

Сесе было бы не докус нечеканоє кываня з бока техноґіґанта: плетькы за появлїня USB-C на iPhone ходят давно, а компанія кладе тото гнїздо у подакотрі другі свої продукты, приміром у нові iPad авадь у Thunderbolt-порты на Mac. Мало того, на сяку переміну годни были тручати Apple и европські законодателї, котрі щи думавут над тым, обы силовати выробникӯв електронікы класти у свою продукцію иппен USB-C — сяк властї хотят рїшити проблему части електроного смітя, котра є наслїдком рӯзноты гнїзд, а значит и ушелиякых кабелю̄в ид ним.

Айбо вєдно з тым проґноз видит ся неєднозначным, бо даже сам Мін Чі Кво у марцьови 2021 писав, ож Apple «не планує лишати Lightning у видимӯв будучности». Кромі того, ціркуловали думкы, ож Apple май скорї докус забере гнїзда з iPhone тай буде розрахововати на бездротову зарядку ги перейде на USB-C.

Жерело: 郭明錤 (Ming-Chi Kuo) @ Twitter

Читайте нас на Twitter, Telegram тай Instagram