Apple буде варовати хосноватилю̄в уд фінанцованых державами кіберугроз

Удповідна сторӯнка ся появила на офіціалнӯм сайтї Apple Support.

Ги написано на тӯв сторӯнцї, купертінӯвська компанія зачне указовати шпеціалні уповісткы свойим хосноватильом, котрі годни быти потенціалными цїлями спонзорованых державами угроз. Не пилуйте пережывати: «читава векшына хосноватилю‌в ниґда не окаже ся межи цїлий сякых атак».

На сякі дїйства з бока Apple є лоґічна причина: недавно техноґіґант заявив, ож буде ся судити из NSO Group, котра є розробником державно профінанцованої шпіонської проґрамы Pegasus, за «слїженя за хосноватилями продуктӯв Apple». Як пише Apple Newsroom, «изглядовникы тай журналішты публично задокументовали історію злохоснованя сього шпіонського софтвера против актівіштӯв, журналіштӯв, дісідентӯв, академікӯв тай представитилю‌в власти».

У Apple завлявут, ож у iOS 15 уровинь защиты против подобных атак пӯдняли — спозад того на днишньый динь не было замічено ни єдної успішної уддаленої атакы на направы з тов верзійов мобілної ОС.

Примір «Threat Notification». Жерело: Apple Support

Кидь Apple замітит активнӯсть, похожу на державно-фінанцованый напад, сістема уповістит хосноватилю‌в двома способами:

горї сторӯнкы appleid.apple.com появит ся плашка «Threat Notification»;
на імейлы а телефоны, скапчані из загроженым Apple-акаунтом, прийдут одповідно письма а iMessage-уповісткы.

У сесих голошіньох будут далші інштрукції за дїйства, котрі хосноватильови вартат учинити, обы защитити ся.

«Наяті державов нападникы сут дуже добрї проплачеными, а йихнї методы — запутаными, чажко замітными, они ся з часом розвивавут. Упознованя сякых атак заложеноє на сіґналох, котрі сут часто неповні тай неідеалні. Годно быти, ож подаякі варованя Apple будут робити не тоды, кой треба, авадь не робити тоды, кой йих буде треба. Не годни сьме розкрыти інформацію за то, на што ся орієнтуєме, кой пущаєме варованя, позад того, ож она даст нападникам возмогу адаптіровати ся тай обыйти сістему.» — Apple Support

Варованя Apple уд кіберугроз ниґда не будут просити вас клынцати на даякі удкликованя, удперати файлы, класти си аплікації авадь профілы, ниґда не будут уд вас жадати паролӯв уд вашого AppleID, кода пӯдтверженя из імейлӯв, телефонатӯв авадь SMS. Усе сьте годни провірити, ци є голошіня истым — про то вам треба лем зайти на appleid.apple.com.

Apple такой нагадує за другі способы защитити ся уд кіберзлочинцю‌в тай шкодных проґрам:

реґуларноє убновляти свої направы ид майсвіжым приступным верзійом софтвера;
заперати направы на паролы;

хосновати двофакторну автентіфікацію, бізӯвні тай унікалні паролы;
класти си аплікації лем из App Store;
не одперати удкликованя тай файлы уд незнакомых посылачӯв.

Жерело: Apple Support

Читайте нас на Twitter тай Telegram