Apple WWDC 2022

На сьому тыжднї прӯйшла Apple’s Worldwide Developer Conference — главноє дїйство про фанатӯв «яблык» за усьый рӯк. На ню̄в Apple обычно обявляє нові верзії свойих операційных сістем, девайсӯв, сервісӯв, тай сись раз не став выйимком. Ушорили сьме вам куртый опис того, што было на WWDC 2022.

iOS тай iPadOS 16

• Переробленый заблокованый екран. Типирькы його мож усяко персоналізовати: уберати цвіты, шрифты, а щи додавати ефект многослӯйности, обы часть фотькы-позадины перекрывала годинку;
• Live Activities API позволит розробникам обновляти пуш-голошіня уд свойих аплікацій у реалному часї — приміром, «на ходу» міняти статістику за фодбалный метч такой на заблокованому екранї;

• У iMessage типирькы мож буде редаґовати тай удаляти недавно загнаті уповісткы про обадва бокы;
• SharePlay, котрый позволяє сінхронізовано позерати відеа тай кіна из цімбором авадь цімборков, типирь буде робити не лиш у FaceTime, айбо и у iMessage. Кроме того, SharePlay буде мати май шыроку пӯдпору ушелиякых бавок;
• Apple Maps дӯстали вылїпшеня. Туды додали май детайлні мапы Франції, Швайцарії, Нідерландӯв, Нової Зеландії, Белґії, Ізрайиля, Ліхтенштайна, Луксембурґа, Монака, Палестины, Саудӯвської Арабії;
• Apple News даст хосновачам можнӯсть пӯдписовати ся на конкретні виды спорта тай команды;
• Apple Pay Later — сервіс, котрый позволит хосновачам розбивати покупкы на чотыри частї без процентної ставкы. Apple заявлявут, ож ися функція буде фунґовати хотьде, де робит Apple Pay;
• Live Text буде годен автоматично товмачити тай заміньовати текст на фотоґрафійох;
• Дїти типирькы зможут просити додаточный час на хоснованя iPad у Family Sharing через iMessage;

• Мож мати «ворошну бібліотеку» з родинов, у котру будут трафляти фотькы, зняті при включеному удповідному режімови;
• переробили Apple Home. Типирькы у аплікації такой у главному меню мож буде увидїти вшыткі девайсы тай вид из камер;

• Режім CarPlay тоже дӯстав читавоє обновлїня, з котрым сись сервіс Apple зможе читати з авта податкы за скороту, уровинь бензіна, кондіціонер — главноє, обы авто могло сякі податкы передати у CarPlay;

• iPadOS стає май мултизадачнов тай похожов на macOS: аплікації мож буде розкладати облоками ги на десктопови. Фіча дӯстала назывку Stage Manager;

Apple Watch

• Чотыри нові ціферблаты: «Астрономія», «Місячный», «Час на бавку», «Метрополітен»;

• Голошіня-«банеры», котрі не будут занимати вшыткый екран годинкы;
• Apple Watch зможе удслїжовати нові метрикы, такі ги: вертікална осцілація при бігови, довжину крока, час контакта из зимльов;
• Аплікація Apple Fitness буде приступна ушыткым — даже тым, тко не має Apple Watch;
• Удслїжованя сна буде хосновати пулсомір тай акселерометер на вызначіня часу, котрый тратите на рӯзні етапы сна;
• Годинкы уд Apple будут мати трекінґ атріалної фібрілації, обы помочи дохторам слїдити за арітмійов сердця тай видїти ци помагат лїчіня;

Новый чіпсет M2

• Процесор на 18% май скорый ги у Apple M1, GPU — на 35%;

MacBook

• Нові MacBook Air дӯстанут май «плоскый» дізайн, товщина корпуса буде 11.3 мм;

• Май читаві вебкамеры у MacBook Air, из роздїлностьов 1080p тай лїпшов адаптаційов ид темнотї;
• 13.6-дюймовый Retina-дісплей, TouchID закладеный у клавешницю, пӯдпора MagSafe, скорої зарядкы, котра буде годна за пӯв годины пӯдняти заряд акумулатора на 50%, компактні зарядні из 2 USB Type-C гнїздами;
• Цїна нового MacBook Air — $1 199, MacBook Pro — $1 299;

macOS Ventura

• Нова верзія компютерної ОС дӯстала назывку Ventura;
• Stage Manager буде и на десктопох уд Apple — вӯн позволит капчати пару аплікацій у єдну ґрупу, обы на них ся фокусовати тай скоро ся переключати межи ґрупами;

• Сістемный глядач Spotlight типирь буде годен указовати передпозераня файлӯв без того, обы хосновач мусїв йих удкрывати;
• У Apple Mail мож буде нарушати тай начасововати заганяня мейлӯв. Гляданя мейлами буде май розумным, зможе глядати подля сінонімӯв тай автоматично поправляти хыбы;
• Бравзер Safari дӯстане пӯдпору «паскею̄в» — сістемы, покладеної вєдно з Google тай Microsoft, обы позволити хосновачам лоґінити ся на вебсайтох через біометрію ги удпечаткы перстӯв авадь упознаваня лиця, без текстовых паролӯв;
• API про розробку бавок Metal буде мати технолоґію апскейлінґа тай май скороє ладованя ресурсӯв;
• iPhone мож буде завадити на MacBook шпеціалным крїпленьом уд Belkin, обы хосновати основну камеру смартфона ги вебкамеру тай мати май читаву кваліту картинкы у відеопереговорох;

• Мало того, мож буде уключити режім указованя вашого (фізичного) робочого стола — iPhone захоснує шырококутні обєктивы, обы хосновач мӯг записовати не лиш самого себе, айбо и то, што вӯн чинит на столї;

Читайте нас на Twitter, Telegram тай Instagram