Apple запустили у США онлайн-бовт на саморемонт iPhone

Типирь властникы «яблычных» смартфонӯв при достаткови навычок будут годни самі си йих ремонтовати, а самостӯйні точкы ремонта дӯстанут май легкый приступ ид детайлам.

Сперед тым купертінӯвська компанія мала славу выробника з жорсткыми правилами ремонта: клієнты мусїли ходити лем у авторізовані сервісні центры, а на етапі збераня направ далшый самостӯйный ремонт нароком компліковав ся незнимаными батерками, памнятьов авадь заклейованьом подаякых міст удну технікы шпеціалным клейом.

Исе важный крок компанії у бӯк лібералізації тої політикы — хоть на йсе ї майскорї дюґнули голосні кампанії за «DIY-ремонт» тай удповідні державні ініціативы. Офіціалный бовт на детайлы про iPhone поку удопре ся лем у США, айбо планує ся, ож май потӯм ун ся появит и у другых крайинох, а до кӯнця рока у ньому появлят ся щий інштрукції, детайлы тай інштрументы про ремонт подакотрых компютерӯв Mac.

Асортімент бовта включає детайлы на iPhone 12, iPhone 13 тай iPhone SE 3. ґенерації — навгул там є веце ги 200 рӯзных детайлӯв, такых ги камеры, батеркы, екраны, гнїзда на SIM-кы и так дале. Діапазон цїн доста шырокый: забештеловати мож як шурубикы за $0.20, так и вшыткый набор про заміну дісплея у iPhone 12 Pro Max (котрый обыйде ся у $312). При тому Apple заявляє, ож сесї цїны не удличавут ся уд тых, котрі сут у сїтцї про авторізованых рітейлерӯв, а клієнты, котрі вернут детайлы на вторинноє перероблїня, дӯстанут бонусы.

Жерело: Apple Newsroom

Читайте нас на Twitter, Telegram тай Instagram