Будуча GeForce RTX 4060 може брати бӯлше світла, як RTX 3070

Будучоє колїно відеокарт выд Nvidia — RTX серії 40* (Ada Lovelace) годно быти домак слобӯдным у спотребі електрикы. Технічный блоґер kopite7kimi, знамый тым, ож часто нашіптує нам рӯзні інсайды за будучі продукты, твердит, ож GeForce RTX 4060 буде брати бӯлше світла, як зодповідник из типирїшнього колїна — GeForce RTX 3070, а значит многым бӯлше, як GeForce RTX 3060 12GB, котру ися модел мала бы замінити на торгови. Но туй вопрос є скорше в тому, ож на кӯлко бӯлше буде брати електрикы? Блоґер kopite7kimi называт читаві арґументы, но редакція бы радила раз брати исе скорше ги гіпотезы, а не тверді доказы.

Конкретні спеціфікації спотребы електрикы GeForce RTX 4060 раз нам не знамі, та раз ото лиш догадованя. Но 16-піновый конектор спортебы електрикы у GeForce RTX 3090 Ti уже каже нам, ож слїдуючоє колїно чіпӯв буде брати многым бӯлше енерґії, гикой типирїшньоє — Ampere.

Карта GeForce RTX 3070 бере 220 ват світла, закидь розогнана верзія може брати 240-250. Но а RTX 3060 — 170 ват, авадь 200 у розогнаному варіантови.

Гіпотетічно (лем гадаєме), ож нова RTX 4060 може мати спотребу помежи 290 тай 250 ват, што сидит даґде помежи флаґманами RTX 3070 тай RTX 3080. Тай попри тото, уже лїтали на інтернетови споминкы за тото, ож чіп нової серії RTX 40- можут мати пікову спотребу выд 400 ват до онь цїлых 650 ват. Доста читаво, гикой на «середнячка».

Буде інтересно побзерати, як тото направду допадне, раз чекаєме офіціалні пудтвердженя выд Nvidia тай дату реліза.

Жерело: Tom's Hardware

Читайте нас на Twitter, Telegram тай Instagram