Ци скоро увидиме Steam на Chromebook?

Исто знаєме ож Google мавут дяку чинити хромбукы ай из бавками, много чого нам на сесе указує. Направду фірма Google уже пару рокӯв лакомит нас возмогов у будучности класти Steam на Chrome OS, тай даже Nvidia недавно указовали куртоє "демо" из пуддержков DLSS на ARM-хромбукови. Сут у нас ай другі пудказкы ид тому, ож будучный "ґеймерськый" хромбук є уже ачий у тестовӯв фазі.

Два годы типирь фірма Google обявила ож они роблят над пуддержков Steam на свойих хромбуках, но не дуже выд них чути за тото выд тоды.

Но блоґ 9to5Google розказує нам ож у кодови операційной сістемы найшли споминкы за три (потенціално ґеймерські) хромбука, тай усї три будут мати клавіатуру из цвітнов пудсвітков (RGB). В публикації тоже гадавут над тым, ож Lenovo тай HP годни робити над тестовыми хромбуками бавячам, на сесе нам указувут даякі контрібуції у код Chrome OS выд робӯтникӯв сих компаній. А вже тритьый девайс, за котрый сут споминкы у кодови — Ripple, мав бы быти планшетом из клавіатуров, котру мож легко выдкапчати/прикапчати.

Помежи тым у кодови Chrome OS найшли новый параметер, зодповідный за пуддержку цвітных клавешниць (RGB), а сесе вже дашто, по чому якраз издалека спознаєте новтбук на бавкы. Ясноє дїло ож сесе може быти просто на пуддержку "вонкашньых" клавіатур, котрі прикапчуєте по USB, айбо 9to5Google бизувут ся, ож тото мусит быти на "рӯдну" клавешницю хромбука, ай каже ся якраз за сесї три нові моделы. Сесе може быти нияк межи собов не закапчано, айбо на другого бока знаєме ож RGB-клавешницї сут знаковыми у новтбуках на бавкы.

Помежи тым, Valve аддека презентовали свӯй Steam Deck, невеликый девайс на бавкы базованый на Linux. Єдно што може учинити Steam Deck — зробити бавкы на Linux май популарныма. Ипен из сим нараблявут у Proton Tech, компанія-партнер фірмы Valve. Proton є проґрамовов укладков, яка поволит Steam запускати на Linux тоты бавкы, што перич были доступні лишек на Windows, тай список бавок, котрі ся пуддержувут, лишек росте.

Не так давно Proton дӯстав ай пуддержку майпопуларных сістем против швінґлерства (anti-cheat system): Easy Anti-Cheat (EAC) тай BattlEye. Розробникам бавок щи тото ушытко треба перетестовати, обы набізӯвно знати ож йихня бавка фунґує на Proton из сима стістемами, айбо исе годно дати шансу Steam Deck тай Chromebook тягнути всьо популарноє, выд Apex Legends до PUBG.

Жерело: The Verge

Читайте нас на Twitter тай Telegram