Число «дізлайкӯв» на YouTube стає пріватным
Ґомбичка «не любит ся» при тӯм ся лишит на містї.
За йсе на офіціалному блоґови відеоплатформы появила ся публикація — переміны, описані у ню̄в, поступово будут ся выпускати зачинавучи з днишнього дня.
Нагадаєме си: май давно у сьому годї на YouTube появив ся шор новых функцій тай політик, нацїленых на то, жебы платформа стала май інклузивнов тай чистов уд нежеланого контента. Тоды были додані сплывавучі облокы, котрі звідали автора коментаря, ци вӯн ся бізує го опубликовати даже кидь у текстови його коментаря сут потенціално оскорблявучі слова; из тым ипен убновленьом адмініштрація відеогостінґа учинила свою політику май строгов ид оскорблявучым, токсичным коментарьом, грозьбам тай личным атакам на хосноватилю̄в сервіса.
Такой YouTube експеріментовав из ґомбичков «дізлайкӯв», обы «порозуміти, ци годни были тоты переміны помочи лїпше защищати творцю̄в уд гарасмента тай уменшити число дізлайковых атак, у котрых люде робили над пуднятьом кӯлкости дізлайкӯв пӯд відеами авторӯв.»
«Мы чиниме число дізлайкӯв пріватными по вшыткому YouTube, айбо сама ґомба дізлайка ся ниде не дїне. Ися переміна зачне помалы вступати у важнӯсть из днишнього дня» — офіціалный блоґ YouTube
Подля аналіза, учиненого адмініштраційов платформы у юлови 2021. года, «дізлайковых атак» стало направду май мало, кой хосноватилї перестали видїти число неґативных реакцій на відеа.
Што ся мінят про авторӯв а позирачӯв контента?
Творцї ай так будут видїти точну кӯлкӯсть дізлайкӯв пӯд свойими відеами у YouTube Studio.
Позирачі ай так будут годни кореґовати свої рекомендації тай пріватно дїлити ся думков из авторами відий через реакцію «не любит ми ся».
Як уточняє команда YouTube, у часї експерімента подаякі хосноватилї уповіли, ож орієнтувут ся на число дізлайкӯв, обы порозуміти, вартат побзерати даякоє відео ци нїт. «Знаєме, ож годни сьте не согласити ся з тым рїшеньом, айбо віриме, што йсе то, што треба учинити про платформу» — сяк на то выдповідат адмініштрація YouTube.
«Хочеме вытворити інклузивноє тай честовучоє окруженя, де творцї дӯстанут шансу стати успішными тай будут годни ся чуствовати у безпецї, кой ся высловлювут. Исе лем єден из многых крокӯв, котрі чиниме про защиту авторӯв уд гарасмента. Наша робота туй не є завершена, продовжиме укладати ся у сесе» — офіціалный блоґ YouTube
Жерело: YouTube Official Blog
Читайте нас на Twitter тай Telegram
