Ціфрові копії бавок на PS3 тай PS Vita зачали пропадати из направ

Хосновачі PlayStation 3 тай PlayStation Vita зачали мати проблемы из приступом ид цїлому шорови бавок, пӯсля чудної проблемы из «турміньом» тых бавок. Гикой голосили у Kotaku, проблема ся кынула майбӯлш старых класічных бавок, хосновачі кажут ож неприступными сут Chrono Cross, Chrono Trigger, тай Final Fantasy VI. Сістема каже ож сесї бавкы ся попсовали.

Из чудного — сістема каже ож турмінь бавкам выйшов пӯвстороча назад. Єден хосновач твітера, Крістофер Фус (hristopher Foose) пошырив образчик свої бавкы Chrono Cross, де файно видко, ож бавцї выйшов турмінь 31. децембра рока 1969. Вӯн такой дале пише, ож ґандж адсись указав ся лиш кой бавка была щи раз истягнута из інтернета, та типирь є неприступна, не мож ї бавити на PS3 тай PS Vita.

Редактор GameHub, Едмонт Тран (Edmond Tran) тоже найшов у себе таку саму хыбу, не може запустити Chrono Cross на своюй PS3. Каже, ож хоть бавка до типирь запускат ся на PS Vita, уже не видко ї у бовтови бавок PS Store, може Sony забрали ї гет. Другі хосновачі Reddit тай Twitter тоже пишут за сяку такой проблему из другыми бавками: Rune Factory Oceans, Super Street Fighter IV: Arcade Edition, Gex: Enter the Gecko, а у подакотрых хосновачӯв хыбит цїла бібліотека бавок.

Много люди, котрых найшла ися біда, пишут, ож пробовали змітовати штімованя направы до «заводськых», пробовали выдписати ся тай наново пудписати ся на PlayStation Plus, пробовали поновити ліцензію бавкы. Раз не помагало нич. Сама фірма PlayStation щи ся не узвала, не дали ниякый коментарь за сесю ситуацію.

Єдна гіпотеза каже нам, ож сесе може быти блуд у кодови, котрый змітує турмінь ліцензії бавкы до спеціфічної даты в сістемі Unix, авадь другої натвердо-закодованої даты в сістемови. Сяку гіпотезу высовали у Kotaku.

Даже кидь сесе было учинено не нарочно, кидь тото є лишек проґрамова хыба, исе смутна новина, бо значит у Sony не дуже ся творят на свӯй продукт. Фірма уже скоро затворила бовты бавок на PS3 тай PS Vita гӯдтипирь, тай читаво изкомпліковала сам процес купованя бавок, бо забрали выдті можнӯсть платити картями.

Будеме никати як тото допадне дале.

Жерело: The Verge

Читайте нас на Twitter тай Telegram