Чемпіонат DoTA 2 The International буде у Сінґапурови

Каждорӯчный турнір у первый раз в історії буде у Южно-Выходному реґіонови, удбуде ся у Сінґапурови у октовброви сього року. До сього чемпіонат проводив ся у ЗША, Канадї, Кітайови, Нїмеччинї, у Румунії.

Фірма Valve оголосила сесе у твітерови, но кроме локації не было выголошено ниякых другых детайлӯв за конкретноє місто (стадіон?) авадь датум. Сись турнір є добре знаный тым, ож помежи чемпіонатами у кібер-спортивных дісціплінах має веліканськый прізовый фонд — тогорӯчный чемпіон дӯстав дараб из сумы бӯлше ги 40 міліонӯв америцькых доларӯв. Вшыткый прізовый фонд збират ся у самӯв бавци ги процентна доля из уднушньых куповань у DoTA 2, тай дінаміка за послїднї рокы йде лишек идгорі. Яка ціфра нас чекат сього рока — тото точно не знаєме, но можеме набизӯвно уповісти ож не менша, ги того року.

Чемпіонат рока 2020. быв изрушеный, авадь лїпше уповісти выдкладеный, спозад пандемії віруса COVID-19, было заплановано провести го у Швеції минулого рока. Но так ся стало ож фірма Valve, што сут орґанізаторами чемпіонату, мала конфлікты из урядом Швеції, та турнір наскоринько перенесли у Букурешт, Румунія. Правда, у Букурештї тоже не вшытко пӯшло за планом, тай фірма Valve у резултатови мусїла провести тернір без позирачӯв, из пустым залом, спозад читавого числа зараженых COVID-19 у тот період часу, дорадили ся были ож збирати тоту вшытку чилядь на стадіонови є небезпечно. Што ся кыват сьгорӯчного чемпіонату у Сінґапурови, та щи не знаєме як Valve будут нарабляти из варованьом чиляди выд віруса. Будеме чекати на далші детайлы.

Жерело: The Verge

Читайте нас на Twitter, Telegram тай Instagram