Ethereum (май назад) ладит ся перейти на proof-of-stake

На сись раз спӯвзаложитель кріптовалуты Ethereum Віталік Бутерін, выступавучи на конференції ETH Shanghai Web 3.0 Developer Summit, уповів, ож переход на новый консенсуалный механізм proof-of-stake стане ся у авґустови 2022. года... кидь не буде нюансӯв, позад котрых сякый серіозный крок годен быв бы ся май назад удчасовати.

Кидь думаєте, ож «а, та што ми з того, я ай так кріптовалутами ся не занимаву» — повірьте, сеся зміна годна повплывати и на вас. Дїло у тӯм, ож при валідації кріптооперацій подля прінціпа proof-of-work — майнінґови — активно хоснувут ся раховалні можності гардвера. Иппен завто мы уже не первый рӯк страдаєме уд дефіціта тай дуже высокых цїн на відеокарты, нагромадникы тай осталноє «жилїзо». Кроме того, майнінґ дуже не ефективно кильтує електроенерґію, тай є домак не еколоґічный: приміром, ги уже сьме писали май давно, єдна біткоінова транзакція продукує смітя вагов ги два iPhone, а кріптовалута Chia, котра ся майнит на діскох фурташньої памняти, дуже скоро «убиват» апаратуру.

Розробникы Ethereum заявлявут, ож удказ уд proof-of-work на хосен proof-of-stake поволит уменьшити розтраты енерґії на почти 99.50%.

Надміру оптімістичні проґнозы давати не получає ся: Ethereum уже не первый раз обявлявут переход на proof-of-stake; пережі такі планы были реґуларно удкладені.

Тест моделы proof-of-stake про Ethereum прӯйде 8. юнія — планує ся, ож у часї того теста розробникы узьмут уже фунґувучу на старому механізмови тестову сїтку тай переведут ї на proof-of-stake.

Жерело: ETH Shanghai Web 3.0 Developer Summit

Читайте нас на Twitter, Telegram тай Instagram