Euro Truck Simulator 2 не буде выпускати перич планованоє DLC из російськов тематіков

Розробникы бавкы из фірмы SCS Software розказали, ож не будут продовжовати роботу над тематічным доповніньом ид бавцї, котроє мало быти стілізованоє пуд російські дорогы, спозад російської інвазії тай бруталної войны против Украийны. За сесе ся гласило у блоґови фірмы, котра ся базує у Чехії. Єден из розробникӯв уповів, ож "выдмінити роботу Heart of Russia DLC просто мусай, бо щи ненароком подумавут, ож мы даяк толеруєме сяку невыправдану аґресію из стороны Росії".

Бавка Euro Truck Simulator 2 стала леґендарнов у свому сеґментови з момента выпуска у рокови 2012, што привело ид выпускови шелиякых додаточных DLC тай продуковало читаво роботы розробникам каждый гӯд по выпускови. Тоты додаточні «пакы» читаво розшырили уднушный світ бавкы, поволили бавлячам видїти нові державы удну свого игрового світа. Доповніня Heart of Russia было анонсовано фірмов SCS у Марцьови місяцьови рока 2021, де споминало ся, ож бавка не дасть гет цїлкову карту Росії, но лишек вирьхню течію рїкы Волґа. Даякі лімітовані частины Росії ужек были додані у бавку щи сперед сим, гикой частина доповніня Beyond the Baltic Sea.

Гикой кажут самі розробникы, доповніня Heart of Russia было почти готово, хыбіло може пару тыжднюв до фіналізації ушыткого сперед інвазійов 24. Фебруара. Такой нараз фірма SCS Software зфокусовала ся на пудпорі Украйины, передачі гуманітарної помочи, тай такоє далшоє. Передали ушыткі гроші, зароблені выд доповніня Ukrainian Paint Jobs Pack DLC, на помӯч Украйинї, а то бӯлше ги 85 тисяч копій проданого DLC.

«У розробци нашых бавок мы ся чесно старали держати максімално далеко выд політичных конфліктӯв, обы не вливати на даякого ґлобалного бавляча. Нам ся любит ідея, ож мы сьме даяк закапчані до вороха нашов пасійов ид читавым моторам, ож мы даєме людьом можнӯсть капчатися уєдно через исю бавку, де мож ся провезти у гостї у сосїдню державу віртуално. Но при тӯм, доповніня Heart of Russia указує нам територію ипен Росії, котра виновата у тӯлкох страченых животах, што мы рахуєме ож буде не гӯдно продовжовати роботу над тым DLC»
— каже ся у оголошіньови выд SCS Software

У тот самый час SCS Software кажут ож у будучности годин настати динь, кой исе DLC увидит світ: «Коли прийде час Украийнї залїчити свої раны, выдстройити свої городы, мы віриме ож найдеме спосӯб обы исе доповніня (Heart of Russia) стало інструментом того залїченя».

Жерело: The Verge

Читайте нас на Twitter, Telegram тай Instagram