Facebook хоче поміняти назывку
Медіаґіґант узьме ся за ребрендінґ; сякоє рїшеня годно посунути соціалну сїть на позадину тай покласти ї межи другыми продуктами, спойивши йих ушыткых пӯд стрїхов єдної родичӯвської компанії.
Як нам кажут The Verge, Facebook (айбо ипен родичӯвська компанія, а не сама соцсїть) планує выдверечи минулӯсть тай учинити ребрендінґ. Марк Цукерберґ, CEO компанії, буде розказовати за сисю переміну на другый тыждинь.
Жерела позорувут: Facebook мінят назывку на позадинї новости за вытвореня компанійов „метасвіта“, котрый бы мав стати новов стратеґійов єї роста. Подля інформації The Verge, ребрендінґ годни обявити на каждорӯчнӯй продуктовӯй конференції Connect, котра ся має одбыти 28. октовбра.
Годно быти, ож нова назывка буде даяк изкапчанов зо словом „horizon“ („горізонт“ по-анґліцькы), котроє уже ся хоснує у мінімум двох продуктох віртуалної реаліты. Тотыми продуктами сут соціална платформа Horizon Worlds тай сервіс про віртуалні стрїчи Horizon Workrooms. Віцепрезідент Facebook у ґлобалных звіданьох Нік Клеґ уже уповів, ож у понидїлок зрана держит свої созвоненя у метасвітови з віртуалным столом а дошков.
У сьому часї компанія переживат читавый тиск на себе на позадинї очередного шкандала: из даных, котрі злила Френсиз Гауґен, публика узнала, ож Facebook „кладе астрономічні зыскы над люди“, знає за залежнӯсть неповнолїтньых хосноватилю̄в уд Instagram тай має изглядованя, котроє указало ужасну статістику — 30% дївок пӯдросткового віка чули ся май пӯдло за своє тїло спозад хоснованя Instagram. В удповідь на йсе Марк Цукерберґ написав, ож „ідея, што мы [Facebook — прим. InterФийсы] пріорітизуєме зыск над бізӯвнӯстьов [...] тото просто неправда“.
Медіаґіґант є участником дакӯлкох реґулаторных а юрідичных конфліктӯв, включно з шумным дїлом Cambridge Analytica, у котрому Facebook обвинили у зрушеных обіцянкох сокотити дані хосноватилю̄в пріватными.
На інформацію за планованый ребрендінґ компанія удповіла, ож „не коментує шпекулації а плеткы“.
Жерело: The Guardian
Читайте нас на Twitter тай Telegram
