Ґлобалноє потеплїня дає вірусам шансу шырити ся щи май скоро

Зміны клімата тручавут многых звірюв на нові території, звышувучи шансу вірусам перескаковати из єдного видна на другый, тай ид людьом тоже. Кидь типирїшня тенденція роста температуры ся убстане, та до рока 2070, та у світови годно ся стати до 15 тисяч новых припадӯв помежи видовых стыкӯв. За сесе нам говорит изглядованя, опубликованоє у журналови Nature.

Спомежи 10 тисяч видӯв вірусӯв, котрі гіпотетічно годни ся имити на чилдяника, бӯлша частина крутят ся лишек у дикӯв природї. Причина ся мериґовати є у тому, ож дакотрі из тых вірусӯв годни ся переверечи ай на чилядь, из резултатами близкыми ид тому, што натоворила пандемія COVID-19.

Сесе изглядованя указує нам, ож слїдувучі пару декат будут не просто дуже жаркыми, но ай дуже «бетїжными» — Джордж Албері, еколоґіст універзіты Джорджтавна, єден из спӯв-авторӯв изглядованя

Закидь росте темрература, много видӯв звірюв будут мусїти міґровати, бо клімат міста, де они жиют, дуже быстро ся мінят. Другі можут найти нові міста на проживаня, у котрых до сього умовы не поволяли еґзістовати, тото можут быти міста де было постудено, а типирька май тепло. Міґрувучи звірї будут нести за собов ай свої хвороты тоже. Вірусы типирь будут мати бӯлше перенощикӯв, а щи май — помежи довгыма дістанціями. Исе поволит новым болячкам дӯстати ся міст, де за них перич не чули.

Исе ся може дїяти ай типирька, просто изпрятано выд нашых очи. Нам дуже скоро треба зачати аналізовати ситуацію, призирати ся ид міґраційом звірюв. — каже Албері

Кой ся вірус передає выд єдного біолоґічного вида ид другому, та кажут, ож "вірус ся вылляв". Сякоє ся стало ай из COVID-19, вірус став зонотиком, што значит ож вӯн ся може передавати як пожеми людьми, так помежи чилядником тай другым видом тоже. Сут доказы того, ож жерелом віруса были пергачі, но вірус устиг быв перескочити щи мінімално на єден біолоґічный вид сперед тым, як ся дӯстав ид людьом.

Авторы сього нового изглядованя проаналізовали як ся потенціално годни поміняти міста проживаня бӯлше ги 3000 видӯв звірюв у фурташньо нагрівавучому ся світови. Тоже было прораховано, ож як може поміняти ся приступ ид хоснованьови земли самыми людьми, спозад урбанізації тай ґенералної дефлорації світа.

У світови годно ся стати бӯлше ги 300 000 трафункӯв, кой дває звірюв ся «увидят» у первый раз, кидь середня температура ся пуддоймит лиш на 2 градусы целсія, сяк ся каже у изглядованьови. В бӯлшости такі стрїчи ся станут у тропічных зонах Африкы тай Азії. Сесе годно привести ид бӯлш ги 15 000 трафунком передачі віруса выд єдного вида другому. В бӯлшости прорахованых припадӯв основнов небезпеков у передачи вірусӯв сут пергачі. Они сут унікалні тым, ож сут ссавцї, но при тӯм можут лїтати на далекі дістанції, годни ся перебрати через море из контінента на другый контінент.

Соавтор публикації каже, ож тяжко раз естімовати кӯлко вірусӯв годни ся будут переверечи ипен на люди. Тай бизӯвно бӯлша частина тых вірусӯв не наробит такої біды, гикой наробив COVID-19. Но Албері варує нас, ож кой вірус перескакує из єдного видна на другый, та вӯн попадат у ситуацію, котра го дрылят дуже наскоро еволуціоновати, тай мы не можеме пророковати, ож ци еволуціонована верзія віруса буде май тяжко, авадь май легко капчати ся на чилядника.

Пандемія COVID-19 стала ся такой нараз по тому, як исе изглядованя было довершеноє, тай автор каже ож сесе є сіґналом, ож треба кым май скоро брати ся за аналізу міґрацій звірюв уже днись.

Треба розуміти накӯлко сесе серйозно. Треба розуміти, ож зміна клімата типирька буде майважным каталізатором взникненя новых хворот. Нам треба ладити нашу лїкарську сістему так, обы сьме были ид тому готові. — каже Колін Карлсон, біолоґішта універзітета Джорджтавна.

Типирька мусиме, у рамках дослїдженя новых вірусӯв, руняти тото ид міґраційом звірюв, ги каже нам автор изглядованя. Прийов час порозуміти, ож нашоє здоровля тїсно закапчаноє из здоровльом другых біолоґічных видӯв тоже, не самі сьме туй.

Жерело: The Verge

Читайте нас на Twitter тай Telegram