Мож буде класти емоджі у Google Docs

Фірма Google пудтвердила, ож йихня серсама на ушоріня документох дӯстане пуддержку реакцій емоджіками (смайлами?). У сьому ся каже у офіціалнӯй публикації уд фірмы. У исписови будут ушыткі емоджі, доступні у послїднюм релізови.

У Google опубликовали анімацію, котра указує де ся буде появляти можнӯсть лишати реакцію, там де типирь маєте "Дати коментарь" тай "Навыргнути зміну", кой выдїлятєте дараб текста. При тӯм можете глядати конкретный емоджі, пишучи його текстовый код. У Google кажут ож исе мало полївит хосновачом, дасть йим метод мало май неформално реаґовати, не силувучи йих писати коментарї.

Уже дниська возмога реаґовати на дашто емоджіками стала скоро "стандартом" шелиякых проґрамных продуктӯв, хоть запервоє асоційовало ся ипен из соціалныма сїтями тай чатами (Facebook Messanger, авадь даже Slack). У Google кажут ож сякый крок, из додаваньом емоджі-реакцій, є ступньом ид далшому розшыреньови продукта, бо Google Docs буде надале ся позиціоновати уже не лишек ги текстовый редактор, ай скорше гикой платформа на ворошну роботу.

Фірма каже ож сякі реації емоджіками будут мовчано уключені про ушыткых, тай не мож йих буде выключити гет. Функціонал не буде доступный усьым нараз, но евентуално стане доступный ушыткым до кӯнця апріля місяця. Запервоє доступ до свіжої матарґы дӯстанут хосновачі Google Workspace Essentials, Business Starter, Business Standard, Business Plus, Enterprise Standard тай Enterprise Plus.

Жерело: The Verge

Читайте нас на Twitter тай Telegram