Бравзерна верзія Google Drive лиш типирь дӯстане куртанкы crtl+c/ctrl+v

Фірма Google оголосила ож вебова верзія Google Drive буде бировати вырізати, копіровати тай укладовати файлы куртанками кнопок, ипен так, ги сьте тото привыкли робити у другых десктоповых аплікаціях. Раз бизӯвно знаєме ож сякі куртанкы будут робити у Google Chrome, за другі веб-бравзеры ся раз не казало нич.

Направду тяжко ся вірит, ож сякого функціонала там перич не было, но сяк є. Про каждого хосновача компютера може вызирати, ож можнӯсть узяти файл тай заверечи го у другу тийку простов комбінаційов ctrl+x/ctrl+v є дачим, што мовчано бы мало фунґовати. Айбо кидь зайдете у свӯй Google Drive через бравзер, та увидите, ож нич ся не стане.

«Фрішный» функціонал, котрый поволит вам хосновати ужек привычні комбінації ґомбиць на клавешници, стане доступным усьым хосновачам до четвертого Юнія, ги кажут у Google.

На єдного бока може ся видїти ож інженеры ґуґела мало ся запоздили, но, як мінімум, презентованый функціонал вызират добрі прилаженым. Чекало бы ся, ож сякі куртанкы мали бы робити мовчано, но Google каже ож комбінації клавіш будут робити помежи рӯзными сторӯнками (вкладками) бравзера, ож можете копіровати файл у єднӯв вкладцї, а укласти го у другӯв. Придали ай можнӯсть выдкрыти фасцилку у новӯв вкладци через Ctrl / Cmd + Enter. Кроме того, кидь копіруєте даякый файл у фасцилцї, а пак пробуєте го укласти у документ (Google Doc), та овӯн ся укладе гикой удкликованя (мотуз до файла).

Бодай тоты «нові фічі» не сут аж такі нові, но вызират ож сут готові до роботы.

Жерело: The Verge

Читайте нас на Twitter, Telegram тай Instagram