Google Assistant злїпшує ся, нагадат вам поміняти паролї

Навгул Google Assistant є матарґов, котра была учинена, обы вам економити час у каждоденных задачах. Типирь уже май автоматизованым буде обновльованя паролӯв, котрї были зкомпрометовані у «золлятых» базах даных. За сякі вылїпшеня інформувут нас Макс Вайнбах на твітерови, тай репорт выд Android Police.

На єдному из образчикӯв мы видиме діаолоґовый облачок, на котрому бравзер Chrome, на девайсови на Android, інформує нас, ож парол быв изкомпрометованый у вкраденых базах даных, тай понукат нам го автоматічно поміняти. Другый образчик у твітови указує нам меню из пудтверджіньом, де ся хосновачӯв звідат ци сут согласні обы «Google Assistant ай надале помагав міняти доступы.»

Сеся обнова «помагача» выд Google была анонсована щи гӯдтипирь на Google I/O. Раз буде фунґовати лишек на сайтох, які таку опцію пуддержувут; но задумка є у тому, обы автоматізовати процес выміны паролӯв кым май мож типирь. Помагач выд Google буде валовшен нараз вас привести на трїбну сторӯнку выміны пароля, а вже дале буде выхоснованый базовый функціонал Chrome password-manager, обы новый парол такой укласти.

Блоґ Android Police нагадує нам тоже, ож вы можете ай самі вручну побзерати ци даякі из вашых паролӯв, котрі маєте усокочені у Chrome password-manager, были зкомпроментовані даґде на інтернетови. Тоту опцію найдете у штімованьох бравзера Chrome, у меню паролӯв тай доступӯв. Кидь даякый парол быв изкомпроментованый, попиля нього ся появит кнопка на выміну парола, тай буде видко лоґо помагача выд Google, кидь доступна автоматічна выміна.

Добрі знаєме, ож подобна функціоналнӯсть уже довгый час є у спеціалізованых менеджерах паролӯв, гикой LastPass авадь Dashlane. Айбо бӯлшина люди сохтує укладовати парол у тому, што уже было на телефонови, а значит, ипен менеджер паролӯв выд Google скоро стане кым май масовым тай популарным спомежи них, бо уже го маєте у телефонови.

Жерело: The Verge

Читайте нас на Twitter, Telegram тай Instagram