Хосновачі Google Messages у Індії «топлят ся у рекламі»

Хосновачі мовчаної аплікації на телефонах из ОС Android у Індії зачали скабрити на нечекано великый потӯк рекламы, каже нам выданя 9to5Google. Люди кажут, ож дӯставут повно реклам каждый динь, даже кидь мавут даякый окремый блоковач реклам тай защиту выд спама. Тай маркованя сякых рекламных оповісток, як «спам» докус не помагат. Кроме того ож сяка тенденція ай без того мериґує, проскакує ай доста паскудна реклама кредітӯв, казіно, тай шелиякых страховых фірм.

Ги кажут у 9to5Google, рекламачі хоснувут дїрку у функціоналности RCS, котра поволят бізнесам контактовати свойих клиентӯв оповістками из інтерактівным медіа (образчикы, анімації). Помежи прикладами функціонала на сайтови Google мож видїти ай оповісткы из QR-кодами, тай другыми матарґами на автоматізацію купованя. Но подакотрі акаунты, котрі фірмов Google сут марковані гикой «провіреный бізнес» (по простому за тых ся каже «из синьов галочков») заганявут хосновачам из Індії груды нетрїбної рекламы.

Раз не можеме казати накӯлко ґлобалнов є проблема, но хосновач твітера Аґарвал, публикацію котрого можеме видїти высше, каже ож у нього ися проблема наростала помалы из зачатка рока 2022, а типирь вӯн дӯстає выд 2 до 5 рекламных оповісток каждый динь. При тӯм у выданьови Android Police кажут ож проблему исю видко уже гӯд як, тай жалобы выд хосновачӯв из Індії нароставут каждый динь.

Хоть блокованя тай маркованя оповісткы ги «спам» помагат заблоковати єдну конкретну рекламу, но на другый динь дӯстанете нові. У Android Police кажут ож єден бизӯвный метод знебыти ся проблемы, ото примусово выключити мовчанӯв аплікації Messages функцію RCS у штімованьох.

Сама фірма Google щи раз нияк не коментовала адсись конфлікт.

Жерело: The Verge

Читайте нас на Twitter, Telegram тай Instagram