Instagram тестує новый выгляд потока новинок, май подобный на TikTok

Гикой видиме из сих тестӯв, візуална частина аплікації Instagram чим дале, тым стає май похожа на TikTok. У публикації ресурса TechCrunch каже ся, ож авторы аплікації Instagram експеріментувут из повноекрановым режімом потока публикацій. Нараз, як выдкрыєте аплікацію, та будете видїти сперед собов вертікалный контент. Голова Instagram, Адам Моссері, опубликовав у себе у твітерови відео, де можеме видїти тестованя сиї нової зміны, де ся каже ож подакотрі хосновачі зачнут видїти сякый выгляд.

На образчикови видиме базовый (домашньый) екран аплікації, де видиме потӯк публикаций, а май конкретно: єдну публикацію у повно-екрановому режімови из коментарями, назывков, кӯлкостьов лайкӯв, тай другым матаржиньом накладеными такой звирьхы контента. На образчикови видко, ож на екранови ниє блока из історіями, айбо Сейнї Кім, представник фірмы Meta, каже, ож сякый выгляд, ги на первому образчикови публикації, будете видїти лиш кой зачнете тягнути удолину, а на зачаткови будут доступні ай історії.

Кім каже, ож прості відеа тай образчикы тоже будут додані у сякый новый формат потока публикацій.

Сякоє рїшеня, обы ся фокусовати ипен на повно-екрановому відеови, доста чекало ся. Instagram актівно давили новый формат відей — Reels, тай приманьовали хосновачӯв платформы шелиякыми бонусами, тай даже грошовыми выплатами авторам майпоплураных відео. Тай не чудно ож исе є снагов конкуровати из TikTok. У Апрільови місяцьови Моссері казав, ож платформа буде пріорітезовати ориґіналный контент у потокови публикацій, а значит репосты из TikTok будут ся появляти многым май рїдко. У тот самый час платформа Instagram пробує розшырити шелияку серсаму про создавачӯв відео-контента, наприклад у Апрільови місяцьови зачали тестовати шаблоны про відеа у форматови Reels, што зась є лиш повтором функціоналности TikTok.

Жерело: The Verge

Читайте нас на Twitter, Telegram тай Instagram